Shqiptarit i hiqet leja e qëndrimit pas 34 vjetësh në Zvicër !
Burri, i lindur në vitin 1968, kishte ardhur në Zvicër në vitin 1990 dhe kishte kërkuar azil, por kërkesa e tij ishte refuzuar. Një vit më vonë ishte martuar me një shtetase zvicerane dhe kishte marrë leje qëndrimi, ndërsa nga shkurti i vitit 1997 kishte leje të përhershme. Martesa e parë përfundoi në vitin 1997, kurse në vitin 2000 ai u martua në Kosovë dhe nga kjo martesë ka tre fëmijë; bashkëshortja dhe fëmijët kanë shtetësi zvicerane që nga viti 2015.
Rasti që rëndoi më së shumti mbi të lidhej me një mashtrim të kryer për një periudhë të gjatë, nga viti 2004 deri më 2015. Gjykata e Lartë e Kantonit të Cyrihut e kishte dënuar në dhjetor 2021 me tre vjet e gjysmë burgim për mashtrim tregtar me dëm prej 474,032.20 frangash, si dhe për disa shkelje të rënda të rregullave të trafikut dhe një vjedhje.Sipas materialit të publikuar nga media zvicerane, mashtrimi lidhej me përfitime të mirëqenies sociale dhe kishte zgjatur rreth 12 vjet. Në dosjen e Gjykatës Federale theksohet se shuma e dëmit nga mashtrimi ishte mbi 474 mijë franga, ndërsa gjykata e konsideroi kohëzgjatjen dhe përmasën e veprës si elemente rënduese
Ky nuk ishte dënimi i vetëm i tij. Sipas vendimit të Gjykatës Federale, ai kishte gjithsej 15 dënime penale, përfshirë vjedhje, dëmtim prone, hyrje pa leje dhe shkelje të rregullave të trafikut. Për dënimin e vitit 2021, ai qëndroi në burg nga shtatori 2022 deri në janar 2025.Autoritetet zvicerane të migracionit e kishin paralajmëruar pesë herë më parë se mund ta humbiste lejen e qëndrimit.
Në nëntor 2024, Zyra e Migracionit e Kantonit të Cyrihut vendosi t’ia revokonte lejen e përhershme dhe ta largonte nga Zvicra, ndërsa ankesat e tij në instancat kantonale nuk patën sukses.Ai iu drejtua më pas Gjykatës Federale, duke kërkuar që ta mbante lejen e përhershme ose, si alternativë, t’i jepej një leje qëndrimi më e kufizuar. Në argumentimin e tij theksoi se kishte jetuar në Zvicër për më shumë se 34 vjet, se bashkëshortja dhe fëmijët e tij jetonin aty dhe se largimi do ta ndante nga familja.
Gjykata mori parasysh kohëzgjatjen e qëndrimit dhe lidhjet familjare, por vlerësoi se interesi publik për largimin e tij ishte më i madh. Në vendim u theksua se ai kishte kryer vepra penale gjatë një periudhe rreth 17-vjeçare, pavarësisht paralajmërimeve të përsëritura të autoriteteve të migracionit.Gjykata vlerësoi gjithashtu se integrimi i tij ekonomik dhe gjuhësor kishte qenë i dobët. Sipas vendimit, ai kishte qenë i papunë nga viti 2003 deri në vitin 2022 dhe, edhe pas më shumë se tri dekadash qëndrimi në Zvicër, kishte kërkuar përkthim në gjermanisht gjatë një interviste me autoritetet dhe nuk kishte paraqitur certifikatë të njohjes së gjuhës.Në anën tjetër, Gjykata Federale pranoi se kthimi në Kosovë pas më shumë se 33 vjetësh mund të ishte i vështirë.
Megjithatë, ajo konstatoi se burri kishte lindur dhe ishte rritur në Kosovë deri në moshën 22-vjeçare, fliste shqip, kishte ende familjarë të afërt atje dhe e kishte vizituar rregullisht Kosovën gjatë pushimeve.Në përfundim, Gjykata Federale vendosi se heqja e lejes së përhershme dhe largimi nga Zvicra ishin masa proporcionale dhe nuk cenonin në mënyrë të palejueshme të drejtën e tij për jetë private dhe familjare. Ankesa u hodh poshtë, duke e bërë përfundimtar në këtë procedurë vendimin për revokimin e lejes së qëndrimit.
/ms
