Gjykata kërkon dorëzimin e Muharrem Ibrajt, ish-policit serb që dëshmoi në mbrojtje të Millosheviqit

Gjykata Themelore në Prishtinë i ka bërë thirrje Muharrem Ibrajt, të akuzuar për krime lufte kundër popullsisë civile, që të dorëzohet para organeve të ndjekjes, në mënyrë që procesi gjyqësor të zhvillohet në praninë e tij, raporton Gazeta Sinjali.

Departamenti Special ka caktuar seancën për më 28 shtator 2026, në orën 09:30, në sallën D17 të Pallatit të Drejtësisë në Hajvali. Trupin gjykues e kryeson gjyqtarja Violeta Namani Hajra.

Aktakuza ndaj Ibrajt është ngritur nga Prokuroria Speciale më 19 mars 2025. Ai ngarkohet me veprën penale “Krime të luftës kundër popullsisë civile”, sipas nenit 142, lidhur me nenin 22 të Ligjit Penal të ish-Jugosllavisë, si ligj në fuqi në kohën e kryerjes së veprës së pretenduar.

Gjykata u ka kërkuar edhe qytetarëve që kanë informacione për vendndodhjen e të akuzuarit t’ia përcjellin ato Policisë së Kosovës ose organeve të tjera kompetente.

Kush është Muharrem Ibraj?
Sipas një raportimi të mëhershëm të Sinjalit, Ibraj është nga fshati Osek Hilë i Gjakovës dhe ka qenë pjesëtar i policisë serbe. Në vitin 2005, ai kishte dëshmuar në Hagë në mbrojtje të Sllobodan Millosheviqit.

Emri i tij ishte përmendur edhe gjatë dëshmisë së Nasim Haradinajt në Dhomat e Specializuara, më 11 janar 2022. Haradinaj kishte pretenduar se Ibraj kishte kryer krime ndaj fqinjëve shqiptarë duke mbajtur uniformë serbe. Këto ishin deklarime të Haradinajt në seancë, të raportuara nga Sinjali.

Në njoftimin e fundit, Gjykata Themelore ka bërë të ditur se aktakuza dhe ftesat për seancë janë publikuar në faqen e saj zyrtare dhe në Gazetën Zyrtare. Ibraj prezumohet i pafajshëm derisa fajësia e tij të vërtetohet me vendim të formës së prerë.

/ts