Safe City këto ditë do të fillojnë t’i kapin targat e mërgimtarëve !

Nëse vozitni me 80 kilometra në orë në një zonë ku kufizimi është 50 kilometra në orë, ndërsa automjeti ka targa të huaja, do të shpëtoni pa u ndëshkuar, sepse kamerat e sistemit “Qyteti i Sigurt” ende kapin vetëm shoferët vendas, transmeton Portalb.mk.

Problemi është veçanërisht i theksuar gjatë periudhës së verës, kur nëpër vend kalojnë mijëra shoferë të huaj, ndërsa nuk ka mundësi që shpejtësia e tyre e tepruar apo çfarëdo shkeljeje tjetër të regjistrohet dhe të sanksionohet para se ta kalojnë kufirin e Maqedonisë së Veriut.

Nga Ministria e Punëve të Brendshme (MPB) për Slloboden Peçat kanë bërë të ditur se “Qyteti i Sigurt” këto ditë do të fillojë të funksionojë fillimisht në Tabanoc, e së shpejti edhe në të gjitha pikat kufitare. Megjithatë, nuk ka afat konkret se çfarë nënkupton “së shpejti”.

“Sistemi ‘Qyteti i Sigurt’ këto ditë do të fillojë të funksionojë në Pikën Kufitare Tabanoc, ku të gjithë shoferëve të automjeteve me targa të huaja, të cilët sistemi i ka evidentuar se kanë kryer kundërvajtje ose vepër penale në territorin e Republikës së Maqedonisë së Veriut, do t’u komunikohet se kanë kryer shkelje, do t’u lëshohet Procesverbal për kundërvajtje në komunikacion së bashku me urdhërpagesë për kundërvajtje, pas së cilës do t’u ofrohet mundësia të paguajnë ose do të dërgohen në gjykatën kompetente me procedurë të shpejtë. Kjo mënyrë e funksionimit së shpejti do të zbatohet në të gjitha pikat kufitare”, thonë nga MPB-ja.

Derisa të bëhet e qartë se si do të funksionojnë në praktikë urdhërpagesat apo gjykatat, për qytetarët e huaj e vetmja pengesë në rrugë mbeten policët e trafikut.

Kamerat e këtij sistemi gjatë pesë muajve të parë kanë evidentuar më shumë se 120 mijë shkelje, prej të cilave madje 95 përqind kanë të bëjnë me tejkalimin e shpejtësisë.

Nga MPB-ja u bëjnë apel drejtuesve të automjeteve që në mënyrë të vazhdueshme t’i respektojnë rregullat dhe dispozitat e komunikacionit.

Kujtojmë se sistemi ‘Qyteti i Sigurt’ hyri në fuqi pasi deputetët më 23 janar votuan për ndryshimet në Ligjin për Kundërvajtje. Sipas pushtetit ky sistem do të rrisë sigurinë në trafik, ndërsa sipas opozitës ka kritika të ndryshme për mangësi të sistemit.

/portalb