Punëtorët në Slloveni mund të marrin deri në 100 euro më shumë neto në muaj ?

Kryeministri Janez Jansha ka bërë të ditur se reforma pritet të shqyrtohet në fillim të vitit 2027, ndërsa një nga çështjet kryesore do të jetë rritja e lehtësimit të përgjithshëm tatimor. Megjithatë, modeli përfundimtar ende nuk është miratuar dhe qeveria planifikon ta koordinojë atë me sindikatat dhe punëdhënësit.

Lehtësimi i përgjithshëm tatimor në Slloveni aktualisht është pak më shumë se 5.500 euro në vit. Një reformë e mëparshme kishte paraparë rritjen graduale të tij deri në 7.500 euro, por ky proces u ndërpre. Sipas përllogaritjeve të publikuara nga 24ur, një punonjës me pagë mesatare sot merr rreth 42 euro më pak në muaj sesa do të merrte nëse rritja e planifikuar më herët do të ishte zbatuar plotësisht.

Gjatë fushatës zgjedhore, presidenti i NSi-së, Jernej Vrtovec, kishte propozuar që lehtësimi i përgjithshëm të rritej menjëherë në 8.000 euro dhe më pas gradualisht në 10.000 euro deri në vitin 2029. Sipas një përllogaritjeje të 24ur, nëse lehtësimi do të arrinte në 10.000 euro, një punonjës me pagë mesatare mund të merrte afërsisht 100 euro më shumë neto në muaj. Por kjo mbetet një propozim politik dhe jo një masë e miratuar.

Në anën tjetër, Lëvizja Svoboda, tashmë në opozitë, ka propozuar rritjen e lehtësimit në 6.500 euro. Sipas të njëjtave llogaritje, një nivel i tillë do t’i sillte një punonjësi me pagë mesatare rreth 20 euro më shumë në muaj. Ministri i Financave Andrej Šircelj ka thënë se zgjidhjet përfundimtare do të harmonizohen me sindikatat dhe punëdhënësit, çka do të thotë se ende nuk ka vendim se cili model do të zbatohet.Debati për uljen e barrës mbi pagat zhvillohet në një kohë kur Sllovenia renditet ndër vendet e OECD-së me ngarkesë relativisht të lartë tatimore mbi punën.

Sipas OECD-së, në vitin 2025 “pyka tatimore” për një person beqar pa fëmijë që fitonte pagën mesatare ishte 45,3 për qind e kostos totale të punës, krahasuar me mesataren prej 35,1 për qind në OECD. Me këtë nivel, Sllovenia ishte e gjashta ndër 38 vendet e krahasuara.Për punonjësit, efekti kryesor i mundshëm i reformës do të ishte rritja e shumës që mbetet në llogari pas tatimit. Nëse rritet lehtësimi i përgjithshëm, një pjesë më e madhe e të ardhurave nuk do t’i nënshtrohej tatimit mbi të ardhurat, duke rritur pagën neto edhe nëse paga bruto mbetet e pandryshuar.

Megjithatë, efekti konkret do të varet nga paga, niveli përfundimtar i lehtësimit, shkalla tatimore dhe rrethanat individuale të secilit punonjës.Ndryshimet nuk pritet të hyjnë në fuqi menjëherë. Qeveria fillimisht duhet ta përgatisë dhe harmonizojë reformën, më pas propozimi duhet të kalojë procedurat ligjore dhe parlamentare. Për këtë arsye, shifrat prej 20, 42 apo afërsisht 100 eurosh më shumë në muaj duhen parë si përllogaritje të skenarëve të ndryshëm dhe jo si rritje e garantuar e pagave. Rregullat eventuale do të vlejnë sipas statusit tatimor dhe të ardhurave, prandaj mund të jenë të rëndësishme edhe për punëtorët nga Kosova që jetojnë dhe punojnë në Slloveni.

/ms