Dyshime për pastrim parash: Pse disa sallone berberi në Zvicër qëndrojnë hapur me pak klientë?

Disa berberhane në Zvicër po tërheqin vëmendjen për shkak të numrit të ulët të klientëve, ndërsa vazhdojnë të funksionojnë pavarësisht kostove të qirasë dhe pagave, raporton albinfo.ch. Një ekip i televizionit frankofon RTS ka vëzhguar dy sallone në Lozanë, duke ngritur pikëpyetje mbi mënyrën se si ato arrijnë të jenë ekonomikisht të qëndrueshme, përcjell albinfo.ch.

Berberhanja e parë ofron prerje flokësh me çmime shumë të ulëta, nga 25 deri në 27 franga. Gjatë një jave vëzhgimi, tre berberë ishin të pranishëm për rreth 11 orë në ditë, ndërsa në disa raste kalonin kohën duke pritur jashtë sallonit. Mesatarisht, numri i klientëve ishte më pak se 10 për punonjës në ditë.

Sipas Damien Ojetti, president i shoqatës Coiffure Suisse, një biznes i tillë do të kishte nevojë për rreth 16 klientë për punonjës në ditë për të qenë rentabël. Megjithatë, salloni në fjalë funksionon që nga viti 2018.

Edhe një sallon i dytë në qendër të Lozanës, i hapur që nga viti 2021, u vu nën vëzhgim. Në një ditë u regjistruan vetëm tetë klientë, ndërsa në ditët e tjera numri ishte mesatarisht 15 deri në 20 klientë për punonjës. Për shkak të lokacionit qendror, ky biznes ka edhe kosto më të larta fikse.

Të dhënat e deklaratave tatimore të shqyrtuara nga RTS tregojnë se disa berberhane në kantonin Vaud deklarojnë të ardhura shumë të ulëta ose edhe humbje. Një nga bizneset e analizuara, i organizuar si firmë individuale, kishte deklaruar rreth 30 mijë franga të ardhura vjetore për pronarin, ndërsa një tjetër, si GmbH, kishte deklaruar humbje prej rreth 40 mijë frangash.

Ekspertë dhe përfaqësues të sindikatave kanë ngritur edhe shqetësime për kushtet e punës. Laurent Crevoisier nga sindikata Syna Jura pretendon se disa sallone mund të kompensojnë numrin e ulët të klientëve përmes shfrytëzimit të punëtorëve. Sipas tij, 91 për qind e kontrolleve të kryera në kuadër të kontrolleve të përbashkëta punëdhënës-sindikatë kanë konstatuar shkelje të kontratës kolektive të punës.

Ndërkohë, Policia Federale zvicerane ka paralajmëruar prej vitesh për rrezikun që disa berberhane të përdoren si mbulesë për aktivitete të paligjshme të lidhura me krimin e organizuar. Zëdhënësja e fedpol-it, Mélanie Lourenço, ka deklaruar se numri i këtyre bizneseve vazhdon të rritet dhe se ekziston shqetësim për infiltrimin e mundshëm të tyre nga organizata kriminale.

Megjithatë, RTS thekson se shifrat e vëzhguara në vetëm dy sallone nuk janë të mjaftueshme për të provuar parregullsi. Vetëm shqyrtimi i plotë i kontabilitetit mund të tregojë nëse një biznes është përfshirë në aktivitete të paligjshme.

/Albinfo.ch