Ngrohja “djeg” buxhetin familjar! Çmimet e drurit ja sa kan shkuar ?

Dimri ende nuk ka trokitur, por çmimet e druve për ngrohje kanë filluar të “përvëlojnë” xhepat e qytetarëve. Një metër kub dru në treg po shitet deri në 5.500 denarë, ndërsa familjet që këtë dimër do të ngrohen me dru përballen me një tjetër shpenzim të madh. Me afrimin e sezonit të ftohtë pritet që kërkesa të rritet edhe më shumë, duke ngritur shqetësimin se sa do t’u kushtojë qytetarëve ngrohja e shtëpive, shkruan gazeta KOHA.

“Çmimet janë bërë shumë të larta dhe për një familje normale nuk është aspak e lehtë të sigurojë dru për gjithë dimrin. Duhet të blejmë disa metra, ndërsa kur llogarit edhe transportin, shuma bëhet edhe më e madhe. Shpresojmë që çmimet të mos rriten edhe më shumë, sepse ngrohja është shpenzim i domosdoshëm dhe nuk mund ta shmangim,” thotë një qytetar.

Në depot private, çmimet aktualisht lëvizin rreth 4.500-5.000 denarë për metër kub, ndërsa në disa raste arrijnë deri në 5.500 denarë. Për familjet që duhet të sigurojnë disa metra kub dru për gjithë sezonin, kjo nënkupton një faturë prej dhjetëra mijëra denarësh. Nga ana tjetër, te “Pyjet Kombëtare”, çmimet janë më të ulëta. Drutë e lisit kushtojnë rreth 3.190 denarë, ndërsa ahu rreth 3.090 denarë për metër kub, pa transport. Për dërgesën paguhen edhe rreth 400 denarë shtesë për metër kub.

Megjithatë, drutë e zjarrit mbeten një konkurrent serioz në tregun e ngrohjes. Të dhënat e fundit tregojnë se shitjet e druve të zjarrit në vend gjatë vitit 2026 janë rritur me 8,6 për qind krahasuar me të njëjtën periudhë të vitit të kaluar. Janë shitur 22.290 metra kub, ndërsa drutë e zjarrit mbeten deri tani produkti pyjor më i kërkuar. Por përveç druve, qytetarët që ngrohen me pelet gjithashtu përballen me shpenzime të konsiderueshme.

Çmimi i peletit varet nga cilësia, prodhuesi dhe vendi i blerjes, ndërsa me afrimin e sezonit të ngrohjes edhe këtu pritet rritje e kërkesës. Për familjet që varen nga peleti, kostoja e furnizimit për gjithë dimrin mund të arrijë në dhjetëra mijëra denarë. Për shumë familje, zgjedhja mes druve dhe peletit këtë vit do të varet jo vetëm nga çmimi, por edhe nga mundësitë financiare, konsumi dhe lloji i ngrohjes që përdorin në shtëpi.

Krahas çmimit të druve, qytetarët duhet të llogarisin edhe shpenzimet për transportin dhe prerjen, të cilat mund ta rrisin ndjeshëm koston finale. E njëjta situatë vlen edhe për peletin, ku shpenzimi për transport dhe sasia e nevojshme për gjithë sezonin ndikojnë në faturën përfundimtare. Me afrimin e temperaturave të ulëta, shumë familje tashmë kanë nisur të sigurojnë furnizimet për dimër. Por pyetja që mbetet është: a do të vazhdojnë të rriten çmimet e druve dhe peletit deri në fillimin e sezonit të ngrohjes, apo tregu do të sjellë një stabilizim të çmimeve?

/(koha.mk)