Tragjedi në Zvicër: Dy punëtorë humbin jetën !
Aksidenti i rëndë ndodhi të mërkurën, më 9 shtator, rreth orës 09:30 në hidrocentralin Ritom. Fillimisht autoritetet raportuan për dy punëtorë të plagosur rëndë, por Policia Kantonale e Ticinos konfirmoi më vonë se të dy kanë humbur jetën, shkruan Blick, transmeton albinfo.ch.
Njëri prej viktimave ishte një 55-vjeçar, shtetas zviceran dhe banues në rajonin e Luganos. Identiteti i viktimës së dytë nuk ishte përcaktuar ende në momentin e njoftimit të autoriteteve. Të dy personat ishin punonjës të kompanisë AET.
Incidenti shkaktoi dëme të konsiderueshme në objekt, ndërsa sipas raportimeve, një pjesë e ndërtesës mund të jetë shembur. Hetimet fillestare po shqyrtojnë mundësinë e një problemi elektrik me një transformator gjatë një testi të vënies në funksion, por shkaku përfundimtar ende nuk është përcaktuar.
Në vendngjarje u angazhuan zjarrfikësit, ekipet e shpëtimit Tre Valli, Rega dhe policia. Zona u sigurua për disa orë, ndërsa hetimet për rrethanat dhe shkakun e saktë të aksidentit po vazhdojnë nën drejtimin e prokurores Valentina Tuoni.
Aksidenti ndodhi në hidrocentralin e vjetër Ritom, i ndërtuar më 1917, dhe jo në objektin e ri që është në ndërtim. SBB dhe AET kanë shprehur ngushëllime për familjet e dy viktimave dhe kanë njoftuar se do të bashkëpunojnë me autoritetet për zbardhjen e plotë të ngjarjes.
/albinfo
