Nga Isufi i parë te Isufi i ri, familja Elezi, një trung që vazhdon të dhurojë krenari dhe mjekë për Kërçovën

Ka familje që lënë gjurmë në histori me një emër, e ka familje që e shkruajnë historinë brez pas brezi. Njëra prej tyre është pa dyshim familja Elezi nga Kërçova, një familje që arsimin, dijen dhe shërbimin ndaj njerëzve i ka kthyer në një mision të tyre jetësor.

Traditë e cila vazhdon edhe sot me diplomimin e Isuf Elezit, pinjollit të kësaj dere të nderuar, i cili mban me krenari emrin e arsimtarit, poetit dhe drejtorit të parës shkollë shqipe “Gjergj Kastrioti – Skënderbeu” në fshatin Sërbicë, të paharruarit Isuf Elezi.

Një emër që bart histori, përgjegjësi dhe frymëzim.
Historia e kësaj familjeje është e jashtëzakonshme. Që në vitin 1970, nga ky trung familjar doli kirurgu Beqir Elezi, doktori i parë shqiptar në Kërçovë. Sot, më shumë se pesë dekada më vonë, kjo traditë kurorëzohet me një tjetër sukses. Është Isuf Elezi ai që bëhet mjeku i 15-të i familjes.

Një shifër që flet vetë për përkushtimin e saj ndaj arsimit dhe profesionit fisnik të mjekësisë. Kështu, familja Elezi është shembull i rrallë i dashurisë për dijen. Veçanërisht në dy brezat e fundit, pothuajse nuk ka anëtar të saj që të mos ketë përfunduar studime universitare. Secili, në fushën e vet, ka dhënë kontribut të vyer dhe është dalluar me profesionalizëm, ndershmëri dhe sukses.

Prandaj, familja Elezi mund të konsiderohet me të drejtë një kampione në nxjerrjen e kuadrove dhe personaliteteve të shquara, një pasuri njerëzore me të cilën krenohen jo vetëm kastriotasit e Sërbicës, por mbarë Kërçova.

Andaj sot, ndërsa i urojmë mirëseardhjen në radhët e bluzave të bardha doktorit të ri Isuf Elezi – Cufit, urojmë që rruga e tij të jetë po aq e ndritur sa ajo e paraardhësve të tij. Le të jetë “Cufi”, mjek i ditur, human dhe i përkushtuar, duke e nderuar emrin që mban dhe familjen nga e cila vjen. Urime, doktor Isuf Elezi!

/tvgurra