Lulzime Osmani – emër i njohur i artit Kërçovar që po përfaqëson qytetin në vend dhe jashtë tij

Kërçova vazhdon të nxjerrë personalitete që me punën dhe talentin e tyre e prezantojnë qytetin në skenën kulturore kombëtare dhe ndërkombëtare. Një prej tyre është edhe artistja grafike dhe doktorja e arteve, Lulzime Osmani, e cila prej më shumë se një dekade është aktive në botën e artit figurativ.

Pas diplomimit në Fakultetin e Arteve Figurative në Tetovë dhe përfundimit të doktoraturës në Sofje, ajo ka marrë pjesë në dhjetëra ekspozita në Kërçovë, Tetovë, Gostivar, Prishtinë, Strugë, Shqipëri, Turqi, Indi, Egjipt dhe vende të tjera, duke e bërë emrin e saj të njohur në qarqet artistike.

Ndër aktivitetet më të rëndësishme të saj është themelimi i Lulu Art Studio, një studio artistike në Kërçovë ku shumë fëmijë dhe të rinj kanë zhvilluar talentin e tyre në pikturë dhe grafikë. Përmes kësaj studioje janë organizuar ekspozita të shumta me punimet e nxënësve, përfshirë ekspozitën e njohur “Children’s World”, e cila tërhoqi vëmendjen e publikut dhe dashamirëve të artit.

Në vitin 2023 ajo hapi ekspozitën personale “Dream – Ëndrra” në Qendrën e Kulturës në Kërçovë, një projekt i mbështetur nga Ministria e Kulturës, ku paraqiti krijimet e saj më të reja artistike.

Aktiviteti i saj nuk është ndalur as vitet e fundit. Përveç ekspozitave personale dhe kolektive, ajo vazhdon të promovojë artistët e rinj përmes Lulu Art Studio dhe të marrë pjesë në projekte ndërkombëtare artistike, duke qenë një prej ambasadoreve kulturore të Kërçovës.
TV Gurra i uron suksese të mëtejshme artistes Lulzime Osmani dhe të gjithë krijuesve që përmes artit promovojnë vlerat e Kërçovës në botë. 🎨👏🏻

/tvgurra