Kolonia “Omer Kaleshi” e shndërroi Kërçovën në galeri të hapur arti

Në Kërçovë këto ditë po mbahet Kolonia e Parë Ndërkombëtare e Artit “Omer Kaleshi”, një ngjarje që ka sjellë artistë nga Maqedonia e Veriut, Shqipëria, Kosova dhe Serbia, shkruan Portalb.mk.

Nga 14 deri më 19 qershor, artistët po krijojnë vepra të reja në nder të piktorit të madh me origjinë nga Kërçova, Omer Kaleshi, duke e kthyer qytetin në një hapësirë krijimtarie, frymëzimi dhe dialogu kulturor.

Kjo koloni nuk është vetëm një aktivitet artistik, por përcjell mesazhin se Kërçova ka potencial të bëhet qendër e rëndësishme kulturore në rajon. Përmes veprave të tyre, artistët po ndërtojnë ura mes vendeve, kulturave dhe brezave.

Organizatorja e kolonisë, Lulzime “Lulu” Osmani, për Portalb.mk vlerëson se kjo ngjarje është shumë më tepër se një aktivitet artistik. Sipas saj, kolonia përfaqëson një urë lidhëse mes vendlindjes së Omer Kaleshit dhe botës së artit bashkëkohor, duke nderuar figurën e artistit që e bëri të njohur emrin e Kërçovës në shumë qendra artistike evropiane.

“Përmes kësaj kolonie, synojmë të nderojmë trashëgiminë e tij artistike, të krijojmë hapësirë për dialog kulturor dhe të sjellim artistë nga vende të ndryshme që, për disa ditë, do ta shndërrojnë Kërçovën në një qendër të krijimtarisë dhe shkëmbimit artistik”, ka theksuar Osmani.

Ajo shprehet se synimi është që kjo koloni të shndërrohet në një traditë të qëndrueshme kulturore, e cila do ta vendosë Kërçovën në hartën e ngjarjeve të rëndësishme artistike në rajon dhe më gjerë, duke krijuar lidhje të reja mes artistëve, institucioneve kulturore dhe dashamirëve të artit.

Kolonia do të kulmojë më 18 qershor, kur në Muzeun e Qytetit të Kërçovës do të hapet ekspozita e veprave të realizuara gjatë ditëve të aktivitetit, duke i ofruar publikut mundësinë të shohë nga afër krijimet e artistëve pjesëmarrës dhe frymën artistike që po mbizotëron këto ditë në qytet.

/portalb