Skandal në gjimnazin “Drita” në Kërçovë !

Ajo që po ndodh rreth Gjimnazit “Drita” nuk mund të trajtohet si një çështje e zakonshme administrative.
Bëhet fjalë për një institucion më të lart edukativo arsimor me rëndësi të veçantë për Kërçovën, për nxënësit, prindërit dhe gjithë komunitetin arsimor. Prandaj, çdo vendim që merret lidhur me drejtimin dhe funksionimin e këtij institucioni duhet të jetë i ligjshëm, transparent, i argumentuar dhe në interesin më të mirë të nxënësve.

Gjatë periudhës së drejtimit të Gjimnazit “Drita” nga prof. Lulzim Sadiku, janë paraqitur parashtresa nga nxënës lidhur me mësimdhënësen e gjuhës gjermane, Syarta S.
Sipas dokumenteve dhe deklaratave të përmendura, përfshirë raportet e nxënësve dhe deklaratat e mësimdhënësve dëshmitarë, drejtoria e shkollës ka ndërmarrë veprime në kuadër të kompetencave të saj dhe në pajtim me legjislacionin përkatës, Statutin e shkollës dhe ligjin për mësimdhënësit dhe bashkëpunëtorët profesionalë.

Në këtë kuadër, është iniciuar procedurë disiplinore pranë Këshillit të Shkollës, si organ kompetent sipas akteve përkatëse.
Këshilli i Shkollës ka formuar komision dhe komisioni ka përgatitur raportin brenda afatit të paraparë.
Më pas, pas një parashtrese pranë Inspektoratit Shtetëror të Arsimit lidhur me pretendime për trajtim të papërshtatshëm psikologjik dhe emocional të nxënësve, nga mësimdhënësja e gjuhës gjermane, Syarta S, është kryer një inspektim i jashtëzakonshëm mbikëqyrës.

Sipas pretendimeve të ngritura, gjatë këtij inspektimi nuk është trajtuar në mënyrë të plotë objekti i parashtresës dhe nuk është konstatuar në tërësi gjendja faktike. Gjithashtu, janë trajtuar çështje të tjera të cilat, sipas interpretimit të palës së interesuar, kanë qenë në kompetencë të Këshillit të Shkollës dhe jo ekskluzivisht të drejtorit.
Është përgatitur procesverbal dhe është dërguar njoftim pranë Komunës së Kërçovës.

Sipas informacioneve të disponueshme, Kryetari i Komunës së Kërçovës kishte autorizuar përgjegjësin e sektorit për arsim për të vepruar lidhur me këtë çështje.
Megjithatë, pyetja kryesore mbetet: mbi çfarë baze ligjore dhe faktike është marrë më pas vendimi për shkarkimin e ushtruesit të detyrës së drejtorit, prof. Lulzim Sadiku?

Dhe këtu fillojnë pyetjet që kërkojnë përgjigje publike.
KËRKOJMË PËRGJIGJE TË QARTA:
1. Cila ishte baza ligjore për shkarkimin e ushtruesit të detyrës së drejtorit?
2. A janë respektuar të gjitha procedurat e parapara me ligj?
3. A është shqyrtuar në mënyrë të plotë raporti i komisionit disiplinor?
4. A janë marrë parasysh deklaratat dhe raportet e nxënësve dhe të mësimdhënësve dëshmitarë?
5. Cilat ishin konkretisht konstatimet e Inspektoratit Shtetëror të Arsimit dhe mbi çfarë baze janë ndërmarrë masat administrative?
6. Nëse procedura disiplinore ndaj mësimdhënëses ka qenë ende në zhvillim, për çfarë arsye është marrë vendim për emërimin e saj në një pozitë drejtuese?

DHE KJO ËSHTË PYETJA MË E RËNDËSISHME:
Si mund të emërohet në krye të një institucioni të rëndësishëm arsimor si që është gjimnazi Drita në Komunën e Kërçovës një person ndaj të cilës, sipas dokumentacionit të përmendur, ka ekzistuar procedurë disiplinore lidhur me trajtim të papërshtatshëm psikologjik dhe emocional të nxënësve dhe pengimin e kryerjes së punës zyrtare ndaj një mësimdhënëseje?

Po ashtu, për shkak të rëndësisë së arsimit për të ardhmen e fëmijëve tanë, emërimi i drejtuesve të institucioneve arsimore duhet të bëhet mbi bazën e ligjshmërisë, profesionalizmit, integritetit dhe interesit më të mirë të nxënësve, dhe jo mbi baza politike, personale apo interesa të tjera që nuk lidhen me interesin publik.
Ne nuk paragjykojmë askënd. Kërkojmë transparencë, dokumente, ligjshmëri dhe përgjegjësi.
Nëse gjithçka është bërë sipas ligjit, atëherë le të publikohen dhe sqarohen faktet.
Gjimnazi Drita nuk është pronë e askujt. Është institucion i fëmijëve tanë dhe i qytetarëve të Kërçovës.

Kërçova meriton drejtësi, jo heshtje.
Transparencë, jo pazare.
Poashtu i ftoj publikisht të gjitha mediat lokale dhe nacionale që ta hetojnë këtë rast deri në fund dhe ta zbardhin të vërtetën. Le të flasin faktet, le të verifikohen të gjitha pretendimet dhe le të bëhet e qartë para opinionit publik se kush thotë të vërtetën dhe kush përpiqet ta fshehë atë.
Shkruan Drita Ademi në Facebook.

/ms