Ja sa para ka fituar dogana e Maqedonisë ?

Drejtoria e Doganave në muajin korrik realizoi arkëtimin më të lartë mujor historik të të hyrave në vlerë prej 14,14 miliardë denarë, që është 1,5 miliardë denarë, ose 11,8% më shumë krahasuar me korrikun e vitit të kaluar.

Drejtori i Drejtorisë së Doganave, Boban Nikollovski, thekson se këto të dhëna janë dëshmi se sistemi që është ndërtuar gjatë dy viteve të fundit po rrit kapacitetin e shtetit për të gjeneruar të hyra më të larta.

“Aspekti më i rëndësishëm është fakti se për herë të katërt në dy vitet e fundit po i tejkalojmë rekordet historike në arkëtimin e të hyrave – duke filluar nga mbi 12 miliardë denarë në korrikun e vitit të kaluar dhe tani mbi 14 miliardë denarë – nuk është vetë shifra, por trendi që ajo pasqyron. Kjo është dëshmi se sukseset nuk janë raste të izoluara, por rezultat i efikasitetit të sistemit që kemi ndërtuar gjatë dy viteve të fundit. Ky sistem na mundëson të gjenerojmë të hyra më të larta dhe të sigurojmë kushte më të mira jetese për qytetarët”, tha Nikollovski.

Sipas analizës së arkëtimit të të hyrave për muajin korrik, rritja në pjesën më të madhe është rezultat i rritjes së furnizimeve me pajisje nga Ministria e Mbrojtjes, rritjes së importit të naftës dhe derivateve të naftës, si dhe rritjes së importit të duhanit dhe produkteve të duhanit.

Në mënyrë kumulative, nga fillimi i vitit e deri në fund të muajit korrik, Drejtoria e Doganave realizoi të hyra totale prej 80,5 miliardë denarë, ose 1,3 miliardë euro, që është 87,6 milionë euro më shumë krahasuar me të njëjtën periudhë të vitit të kaluar.

Nikollovski shton se, si institucion që mbledh miliarda denarë të hyra për Buxhetin e shtetit, detyra e tyre është të sigurojnë kushte më të mira për zhvillimin e biznesit dhe rritjen e konkurrencës së ekonomisë maqedonase.

“Qëllimi ynë është i qartë, po ndërtojmë një sistem ku siguria dhe mbushja e Buxhetit nuk e pengojnë ekonominë, por zhvillohen paralelisht përmes modernizimit dhe menaxhimit të synuar të rrezikut.

Ne vazhdojmë të ndërtojmë një Doganë moderne, efikase dhe profesionale, e cila vazhdimisht jep rezultate dhe kontribuon në një ekonomi më të fortë”, tha Nikollovski.

/ts