Arrestohet në Maqedoni dhe menjëherë lirohet ish-ushtari i UÇK-së !

Ish-pjesëtari i Ushtrisë Çlirimtare të Kosovës (UÇK), Fadil Pushkolli, është ndaluar nga autoritetet e Maqedonisë së Veriut në pikëkalimin kufitar Bllacë–Elez Han, si rezultat i një urdhërarresti të lëshuar nga Serbia, por më pas është lënë i lirë.

Përmes një deklarate publike, Pushkolli ka konfirmuar ndalimin e tij dhe ka bërë të ditur se shkak për këtë masë ka qenë pikërisht kaluara e tij si pjesëtar i UÇK-së.

“Dëshiroj t’ju njoftoj se jam arrestuar në pikën kufitare Bllacë–Elez Han, në territorin e Maqedonisë së Veriut, bazuar në një urdhër të lëshuar nga autoritetet serbe. Arrestimi, sipas informacionit të dhënë, lidhet me faktin se jam pjesëtar i Ushtrisë Çlirimtare të Kosovës (UÇK). Kërkoj që institucionet e Republikës së Kosovës të marrin menjëherë të gjitha masat e nevojshme për trajtimin e këtij rasti dhe mbrojtjen e të drejtave të mia,” ka deklaruar ai.

Pas lirimit, Pushkolli ka falënderuar Policinë e Maqedonisë së Veriut, duke veçuar siç ka shkruar pjesëtarët shqiptarë për korrektësinë, respektin dhe sjelljen e mirë gjatë gjithë procedurës.

“Pas një interviste dhe marrjes në pyetje, jam liruar nga Policia e Maqedonisë së Veriut.
Dua ta falënderoj Policinë e Maqedonisë së Veriut, në veçanti pjesëtarët e policisë shqiptare, për korrektësinë, respektin dhe sjelljen e mirë gjatë gjithë procedurës. UÇK dje, liri sot!”, shkroi në profilin e tij në rrjetet sociale, Fadil Pushkolli.

Ky zhvillim vjen në të njëjtën ditë kur autoritetet në Kroaci liruan një tjetër ish-pjesëtar të UÇK-së, i cili po ashtu ishte ndaluar mbi bazën e fletëarresteve të lëshuara nga Serbia.
Pas verifikimeve dhe procedurave përkatëse administrative, Pushkolli është liruar nga autoritetet e Maqedonisë së Veriut.

/(INA)