A janë zgjedhjet si zgjidhje për Maqedoninë ?

Zgjedhjet e parakohshme parlamentare rikthehen në debatin politik, pasi lideri i BDI-së, Ali Ahmeti, i cilësoi ato si zgjidhjen më të mirë për vendin, ndërsa nga VLEN-i thonë se janë të gatshëm të përballen me zgjedhjet në çdo moment, por nuk i konsiderojnë ato të nevojshme. Për VLEN-in, prioritet mbetet realizimi i premtimeve të dhëna dhe përfundimi i mandatit qeverisës.

Lideri i BDI-së, Ali Ahmeti, konsideron se zgjedhjet e parakohshme parlamentare do të ishin zgjidhja më e mirë për vendin, me qëllim ndryshimin e atmosferës politike dhe parandalimin e përkeqësimit të mëtejshëm të gjendjes. Në një intervistë për emisionin “Click Plus” në TV21, Ahmeti vlerësoi se zgjedhje të parakohshme parlamentare me shumë gjasë nuk do të ketë deri në fund të këtij viti, por vitin e ardhshëm.

Megjithatë, ai theksoi se BDI-ja është e gatshme për zgjedhje në çdo moment. “Duhet të ndryshohet klima, me siguri më duket se edhe partia më e madhe maqedonase e ka kuptuar se gjërat nuk po shkojnë mirë. Duhet të kihet kujdes gjatë zgjedhjes dhe të respektohet shumica shqiptare, ndërsa zgjidhja më e mirë do të ishin zgjedhjet e parakohshme. Nëse do të mbaheshin nesër, ne jemi të gatshëm”, deklaroi Ahmeti.

Sipas tij, është e nevojshme të krijohet një atmosferë e re politike dhe të ndërmerren me kohë hapa për të parandaluar përkeqësimin e mëtejshëm të situatës në vend. Ahmeti vlerëson se zgjedhjet do të mundësonin një ndryshim të klimës politike dhe një rikonfigurim të raporteve politike në vend. Në të njëjtën intervistë, lideri i BDI-së foli edhe për të ardhmen e tij politike, duke pranuar se gjithnjë e më shpesh po mendon për tërheqjen nga politika aktive.

Pas më shumë se dy dekadash në skenën politike, Ahmeti tha se po mendon për pensionimin politik. “Sinqerisht, personalisht po mendoj për këtë, sepse pas meje janë 25 vite politikë dhe histori. Jeta me aktivitete të vazhdueshme dhe me takime sjell ngarkesën e vet”, tha Ahmeti.

/ts