Kërçovë fshati Kollarë i zbrazur, për 5 vjet janë larguar rreth 50 të rinj..(VIDEO)

Politika e gabuar e shtetit, sjell varfëri dhe të rinjtë ikin”, thonë banorët Kollara të Kërçovës, nga i cili fshat brenda 5 vitesh rreth 50 të rinj kanë ikur në perëndim me viza pune.
Migrimi është bërë si murtajë për këtë vendbanim ku kanë mbetur pak të rinj, edhe pse fshati ka një pozitë të favorshme gjeografike sepse këtej kalon rruga magjistrale që lidh pjesën veriperëndimore dhe jugperëndimore të vendit. Shumë shtëpi janë të mbyllura, por edhe ato që janë të hapura kanë ndokënd në kurbet. Popullsia në fshat sapo vjen e plaket.

“Situata në fshatin Kollarë është 0, nuk ka përparësi asgjë, të rinjtë ikin, punë nuk ka, para nuk ka, patjetër të ikin jashtë sepse duan që të ushqehen, sepse këtu shteti nuk ekziston, sepse nëse ekziston shteti të jetë edhe burri edhe gruaja në punë mund të jetojnë disi, por një person t’i mbaj 4 ose 5 vetë nuk mund t’i mbajë, andaj është i detyruar që ta lëshoj vendin, e për ta lëshuar vendin duhet shumë se nuk ka ku e çon plakun, ai vetë do të ikë po mua çfarë do më bëjë, nuk ka unë marr pensionin social 100 euro as për mua mjaftojnë as për në shtëpi”, tha ky banor.

Në fshat takuam një mërgimtar që kishte ardhur për pushime nga SHBA. Na tha se ka shkuar atje me familje para 16 vitesh për arsye ekonomike, ndërsa tregon se fshati po ndryshon nga viti në vit nga shpërngulja e madhe e rinisë.

“Si e kam pa unë fshatin tim para 15 vitesh? Ka pasur më shumë njerëz ka pasur më shumë rini dhe më shumë gjallëri, e tani dalëngadalë shkon nga boshatisja, nga shkrirja, nga ajo me e keqja që s’mund ta quajmë më kurbet, por migracion dhe shpërngulje totale“, u shpreh mërgimtari.

Nuk presin më që fshati të gjallërojë. Me secilin që bisedon thotë se do të largohet dhe nuk do të kthehet asnjëherë këtu.
“Kjo situatë nuk ka zgjidhje sepse të rinjtë nuk kthehen këtu, sepse jetën më të mirë e bëjnë në Evropë ata nuk vijnë ta bëjnë në Kollarë sepse në Kollarë nuk ka asnjë ndryshim, përderisa për mua nuk ka për atë më hiq”.

“Rininë që e kam lënë në SHBA, mundohen të ndërtojnë jetën atje me bashkëshorte me familje dhe merren me biznese të ndryshme dhe është shumë e pabesueshme që të shpresojmë se ata një ditë do të kthehen sërish, qoftë me investim apo thjeshtë si individ”.

Kollara numëron 240 shtëpi dhe afro 1200 banorë, prej të cilëve më pak se 500 banorë jetojnë në fshat, ndërsa numri i nxënësve filloristë ka mbetur shumë i vogël.

VIDEO:

/tv21