Furra Ilirida në Zajaz u dëmtua nga një aksident! Sigurimi nuk e vlerëson dëmin sa duhet, 6 muaj në “luftë”..(VIDEO)
Bëj mirë e gjej keq, thotë një fjalë popullore, e cila po i përshtatet edhe pronarit të furrës Ilirida në Zajaz të Kërçovës. 6 muaj më parë një veturë gjatë natës goditi veturën e furrës me çka dëmtoi derën dhe hyrjen e furrës. Kryerësi i veprës iku dhe la shumë dëme pas, megjithatë uniformat blu e zbuluan autorin. Për të mos hyrë dyerve të gjykatave pronari i furrës është marrë vesh me personin që shkaktoi dëmin që gjithçka të paguante sigurimi i tij.
Me shpresë se po bënë mirë, e keqja e gjeti atë sepse sigurimi i kryerësit të veprës nuk po e vlerëson dëmin sa duhet dhe për 6 muaj furra Ilirida po lufton me këtë problem.
“Më 17 dhjetor të viti të kaluar, pasi ishte mbyllur furra, një veturë goditi veturën tonë të firmës dhe dëmtoi edhe derën e hyrjes të furrës, pastaj iku nga vendi por pasi erdhi policia dhe gjithçka u zbardh, dhe u vendos që sigurimi të paguaj dëmin e shkaktuar nga personi që shkaktoi aksidentin, por gati 6 muaj ne jemi në luftë me sigurimin sepse na bëjnë disa oferta qesharake”, tha Armend Aliu-menaxher i furrës “Ilirida”.
Dëmin që e ka vlerësuar kompania e sigurimit është 1300 euro, ndërsa Aliu thotë se kanë faturat për dëmin që e kanë paguar mbi 2500 euro.
Ndërsa këta janë ofertat që ua ka dhënë sigurimi për dëmin e krijuar.
“D.m.th. derën 21 mijë denar, kanë mbuluar murin edhe pllakat, pllakat I kanë mbuluar 600 denar d.m.th. është një ofertë qesharake sepse sot vetëm ngjitësja për pllaka është 900 denar , po mjeshtri po gjerat tjera, edhe për bllokët që janë thyer kanë lëshuar 1200 denar ofertë. (ngjitje -02:37) Për veturën na ofrojnë 51 mijë denar diku te 700 euro, ndërsa vetura ishte e viti 2004 Opell Kombo mbasi u dëmtua ajo nuk rregullohej, morëm veturë tjetër e viti 96 e paguam 1500 euro “, shtoi Aliu.
TV21 kontaktoi kompaninë e sigurimit në fjalë për të parë se ku qëndron problemi dhe si është evidentuar dëmi e nga atje na thanë se nuk janë dorëzuar fatura nga i dëmtuari dhe dëmin është vlerësuar nga vlerësues të autorizuar.
“Në lidhje me pyetjen tuaj nga emaili i mëposhtëm, ju njoftojmë se në dokumentacionin e dorëzuar për dëmin nuk është bashkangjitur asnjë faturë dhe as dëshmi e pagesës së shumave të treguara nga ju. Për dëmet e raportuara janë bërë raporte të inspektimit dhe vlerësimit nga vlerësuesit e autorizuar dhe dëmet janë bërë në shumat e përcaktuara nga vlerësuesit e autorizuar. Për çdo pyetje shtesë në lidhje me mënyrën e llogaritjes së shumës së dëmit, i dëmtuari mund të na kontaktojë në çdo kohë personalisht ose përmes avokatit të tij”, thonë nga Kompania e Sigurimeve EVRONIS.
Nga ana tjetër menaxheri i furrës Ilirida pretendon se faturat e riparimeve nga dëmet i kanë dorëzuar tek kompania e sigurimit por nuk janë marrë për bazë. Të njëjtat i dërgoi edhe tek TV21, e siç mund të shihni sipas këtyre faturave riparimet që janë bërë pas aksidentit kanë kushtuar 2500 euro.
VIDEO:
/tv21
