Termocentrali i Osllomesë, qindra të punësuar nga fillimi i vitit (VIDEO)
Në kohën kur Termocentrali i Osllomesë punon shumë pak, kombinati edhe më tej punëson punonjës të rinj. Vetëm në këtë vit ka qindra punësime të reja, ndërsa vitin e kaluar kombinati ka punuar vetëm 59 ditë. Nga Elektranat e Maqedonisë së Veriut për Alsat thonë se për Osllomenë është shpallur konkurs për punësime të reja në kohë të pacaktuar. Disa kërçovarë thonë se termocentrali është vend ku partitë rregullisht u gjejnë vend pune anëtarëve të tyre partiak.
“Osllomeja është vetëm për punësime. Para zgjedhjeve, pas zgjedhjeve. Ndoshta edhe mua do më punësojnë ndonjëherë…”
“Punësohen ndonjëherë nga njëri komunitet, maqedonas, pastaj shqiptarë për t’i kënaqur nevojat e votuesve të tyre”.
Reagojnë edhe nga opozita shqiptare. Nga Aleanca për Shqiptarët në Kërçovë thonë se në vend se të ulet ndotja e ajrit në qytet, ndërmarrja punëson njerëz të rinj.
Nga elektranat e Maqedonisë së Veriut thonë se po punësohen vetëm kuadrot që janë më se të nevojshme për procesin e prodhimtarisë dhe për mbarëvajtjen e punës në kompani. Ndryshe në proces e sipër është transformimi i termocentralit. Do të ndërtohet elektrone fotovoltaike prej 100 megavatëve, ndërsa në 3 deri 5 vitet e ardhshme do të zvogëlohet puna e termocentralit.
Të paktën 100 punëtorë do të kalojnë nga Termocentrali i Osllomesë në Ndërmarrjen e re për elektrana fotovoltaike”-tha Vasko kovaçevski, drejtor i EMV-së.
Nga komuna e Kërçovës thonë se edhe pse nuk kanë kompetenca ndaj Osllomesë, ata angazhohen për mbijetesën e kombinatit, por me plotësimin e të gjitha kushteve ekologjike.
VIDEO:
/alsatm
