“Baltë në dimër, pluhur në verë”, banorët e Osllomesë ankohen për termocentralin (VIDEO)

Baltë në rrugët e Osllomesë! Kjo si pasojë e kamionëve të TEC Osllomesë të cilët bartin qymyr nga vendet ku gërmohet dhe dërgohet në vendet ku përpunohet.

Rrugët ku kalojnë, janë të pa asfaltuara, andaj në kohë me shi krijohet baltë, të cilën kamionët e nxjerrin në rrugën kryesore të Osllomesë ku kalojnë të gjithë fshatrat.

Kjo situatë ka bërë që kryetarët e bashkësive lokale të ish-komunës së Osllomesë të ngrihen në këmbë për të kërkuar që rruga të pastrohet dhe të gjendet një rrugë tjetër alternative për kamionët.

“Ditën e premte kishim një takim me drejtorët atë ditë rruga ishte e pa pastruar dhe në të kaluarën ka qenë e pa pastruar dhe ata na premtuan se prej atë ditë do ta pastrojnë dhe ne u dhamë një afat deri sot tani në konsultim me të gjithë kryetarët e Bashkësive lokale duke parë gjendjen në të teren, sot rrugën e kanë pastruar dhe brenda tre ditëve e kanë pastruar dhe ne vendosim se në të ardhmen nëse vazhdojnë të mos e pastrojnë ne do ta bllokojmë rrugën”, tha Feto Fetoja, kryetar bashkësie lokale.

TV21 kërkoi qëndrim nga TEC Osllome nga ku na thanë se i kanë ndërmarrë të gjitha masat për pastrimin e rrugës, por pa dhënë detaje nëse e njëjta do të vazhdojë të pastrohet çdo ditë.

“Në bazë të kërkesave që na kanë ardhur nga Bashkësitë Lokale për mirëmbajtjen e rrugës regjionale Kërçovë-Osllomej, ju informojmë se ne si kombinat i kemi ndërmarrë të gjitha masat për ta lehtësuar qarkullimin në këtë rrugë që ngarkohet si pasojë e qarkullimit të mjeteve që na furnizojnë me qymyr për të mos e penguar qarkullimin e qytetarëve të kësaj ane.

Gjithashtu pastrimi i rrugës bëhet rregullisht për 24 orë gjatë ditës nga ana e Kombinatit të Osllomesë. Ne si kombinat jemi gjithmonë në dispozicion për t’i dëgjuar dhe për t’i adresuar kërkesat dhe shqetësimet e qytetarëve që jetojnë në vendbanimet përreth Kombintatit të Osllomesë”, theksoi Nexhbudin Nuredini, zv/drejtor i TEC Osllome.

Përveç baltës që e kanë problem gjatë dimrit, banorët ankohen edhe për pluhurin gjatë verës. Ata kërkojnë gjithashtu që të rregullohet rruga që është prishur nga kamionët si dhe të vendoset filtër në TEC Osllome. Paralajmëruan se nëse rruga nuk pastrohet edhe ditëve në vijim, do ta bllokojnë me protesta 24/7.

VIDEO:

/tv21