Qëllimet e themelimit të Lidhjes së Diasporës së Bashkuar Kërçovare

Përshëndetje të gjithë Kërçovareve dhe Kërçovarëve në Vendlindje dhe në Disporë!
🇦🇹🇮🇹🇨🇭🇧🇪🇨🇵🇩🇪🇦🇱🇺🇸
Kryesia e Lidhjes së Diasporës së Bashkuar Kërçovare dëshiron të ju njoftojë me disa nga qëllimet e themelimit të Lidhjes:
Lidhja e Diasporës së Bashkuar Kërçovare, mbledh dhe bashkon në gjirin e saj, Kërçovaret dhe Kërçovarët të larguar nga Vendlindja për arsye nga më të ndryshmet. Ajo do të jetë zëri fuqishëm i tyre.

Ajo do të jetë mbrojtëse e interesave të të gjithë pjesëtarëve të saj në Diasporë dhe në Vendlindje.
Përmes organizimit të aktiviteteve të ndryshme, ajo mban gjallë identitetin dhe kujtesën kombëtare dhe ndërton ura komunikimi e bashkëpunimi, në vazhdimësi me Diasporën dhe Vendlindjen.

Lidhja e Diasporës së Bashkuar Kërçovare, do t’i paraqesë, në dritën më të mirë, vlerat kulturore dhe kombëtare, shoqërive vendëse ku ajo jeton dhe vepron, duke forcuar dhe zhvilluar miqësi dhe bashkëpunim të përhershëm.

Lidhja e Diasporës së Bashkuar Kërçovare do të sigurojë koordinimin, bashkëveprimin dhe bashkërenditjen e aktiviteteve të shoqatave lokale duke respektuar autonominë e plotë të tyre.
Ajo nuk është organizëm mbi shoqatat por me shoqatat.

Disa nga qëllimet e Lidhjes janë:
LDBK ka për qëllim të ruaj gjuhën shqipe, të ruaj, zhvillojë dhe kultivojë kulturën, traditën Shqiptare e Kërçovare në Diasporë dhe Vendlindje.

LDBK-ja ka për qëllim që të bëhet pikë takimi e anëtarëve të Diasporës, duke themeluar qendra kulturore të përhershme, që do të paraqesin, në dritën më të mirë, vlerat kulturore dhe historike, shoqërive në vendet ku ato jetojnë dhe do të ndihmojë integrimin e pjesëtarëve të Diasporës në shoqëritë ku jetojnë.

LDBK-ja do të organizojë takime me pjesëtarë të dalluar e të suksesshëm të jetës kulturore-artistike, ekonomike, politike etj… në Diasporë.
LDBK-ja do t’u japë përparësi aksioneve humanitare e kombëtare për të ndihmuar bashkëvendësit në Vendlindje në raste katastrofash natyrore ose rreziqesh tjera.

Lidhja e Diasporës së Bashkuar Kërçovare do të bashkëpunojë me organizata të ngjashme jopolitike për realizimin e aktiviteteve me interes të dyanshëm.
Lidhja e Diasporës së Bashkuar Kërçovare u bën ftesë shoqatave, fondeve dhe organizimeve tjera që veprojnë në Diasporë t’i bashkohen Lidhjes në rrugëtimin e saj sepse bashkimi bën fuqinë.

FOTO: