Çfarë po ndodh me bizneset shqiptare në Kërçovë..?!

Sa mbaj mend unë, Kërçova (si të gjithë qytetet e tjera) gjithmonë ka qenë e ndarë përmes një hendeku nacional (shqiptarë vs. maqedonas). Dy dekadat e fundit madje edhe më shumë, ne kemi pasur organizimin tonë kulturor e biznesor, ata të tyrin.

Në rininë time madje, jo secili i ri shqiptar lejohej t’i frekuentonte pubet e maqedonasve. Me hapjen e pubeve shqiptare në Kërçovë, të rinjtë maqedonas kurrë nuk ka ndodhur t’i shkelin ato dhe të pijnë një kafe të paktën.

Ata i kanë bojkotuar në vazhdimësi bizneset shqiptare në Kërçovë.
Kohët e fundit, kafenetë dhe restorantet shqiptare në Kërçovë janë stërmbushur me kamarierë maqedonas.

Ti u flet shqip, ata ta kthejnë në maqedonisht. Kafja të mbetet në fyt. Jo pse të flasin maqedonisht, por kur e kujton të shkuarën e afërt, si të kthenin nga dera e lokalit vetëm pse ishe shqiptar, të vjen t’i vjellësh zorrët nga barku.

Menaxheri i lokalit sot, pasi reagova me dëshpërim, pse po flitet në restorantet shqiptare maqedonisht, u arsyetua se kanë ikur tashmë të rinjtë tanë. Nuk e kemi fajin as ne. I përzuri politika, më tha. Jo, ne, ia ktheva unë, me votën tonë.

I rrudhi supet ai, tunda kokën unë. Njëri nga sherifët lokalë, i ulur pas meje, që për dy dekada në emër të UÇK-së i rrjepi kërçovarët me ryshfetin e punësimeve, u ngrit dhe ia mbathi nga sytë këmbët. Pas pak hyri një tjetër, nuk u ul, u bë sikur kërkon dikë dhe doli.
Gjithmonë kërkuan fajtorin tek unë, por më nuk mund të fshihen pas meje si armikun e partisë, kërçovarët i kanë kuptuar tashmë kush janë. Ka mbetur tek-tuk ndonjë hallexhi, i cili detyrohet t’i lëvdojë sa për sy e faqe, por që në vetvete i shan pa nge.

Më 30 mars po dilkan rezultatet e regjistrimit të popullsisë, dhe neve s’na mbetet gjë tjetër, pos të shpresojmë në mrekullitë e Nënës Parti.
Shkruan në facebook Dr.prof Arbër Çeliku

/ms