Nxënësit nga gjimnazi i Kërçovës vizitë Parlamentit

Nxënësit e Shkollës së Mesme Komunale “Drita” nga Kërçova, nën udhëheqjen e profesoreshës Arjeta Zeqiri, morën pjesë në aktivitetin edukativ “Kam qëndrim”, të organizuar nga Instituti Parlamentar pranë Kuvendit të Republikës së Maqedonisë së Veriut.
Gjatë aktivitetit, nxënësit diskutuan dhe debatuan për tema aktuale që lidhen drejtpërdrejt me të rinjtë, si bullizmi, shëndeti mendor i nxënësve dhe shpërngulja e të rinjve nga vendlindja.

Duke u vendosur në rolin e deputetëve, ata fituan përvojë të drejtpërdrejtë për funksionimin e demokracisë parlamentare. Përmes debateve, argumenteve, replikave dhe votimit të propozimeve, ata zhvilluan të menduarit kritik, aftësinë për të mbrojtur qëndrimet e tyre dhe respektin ndaj mendimit ndryshe.
Për kontributin në realizimin me sukses të këtij aktiviteti, shkollës sonë i u dorëzua mirënjohje nga Kuvendi i Republikës së Maqedonisë së Veriut.

Shprehim falënderime të përzemërta për drejtoreshën e shkollës, znj. Syarta Spahiu, mbështetja e së cilës ishte vendimtare për realizimin e këtij projekti, si dhe për mbështetjen institucionale, besimin dhe mirëkuptimin ndaj iniciativave që promovojnë dijen, edukimin dhe përfshirjen e të rinjve.
Falënderojmë gjithashtu nxënësit për pjesëmarrjen dhe angazhimin e tyre, si dhe profesoreshën Arjeta Zeqiri për përkushtimin në edukimin dhe nxitjen e frymës qytetare te brezi i ri. Të rinjtë janë një zë i rëndësishëm i shoqërisë sonë, i cili duhet dëgjuar dhe respektuar.

/tvgurra