Pas reagimit publik të “Kërçova nuk është Kichevo !” reagon deputetja Adili-Emini sqaron rastin

Pas reagimeve publike lidhur me shënimin e emrit të qytetit të Kërçovës si “Kichevo” në mirënjohjen e ndarë për Shkollën e Mesme Komunale “Drita”, ka reaguar deputetja Vslbons Adili-Emini.

Përmes një njoftimi publik, Adili-Emini ka sqaruar se bëhet fjalë për një lëshim teknik dhe të paqëllimshëm nga ana e administratës së Kuvendit të Maqedonisë së Veriut.

Sipas saj, menjëherë pas konstatimit të gabimit, gjatë ditës së djeshme janë ndërmarrë masat për korrigjimin e tij dhe është përgatitur një mirënjohje e re, ku emri i qytetit është shënuar saktë – Kërçovë.

Deputetja thekson se ky lëshim nuk e zbeh rëndësinë e aktivitetit dhe mundësinë që nxënësit e SHMK-së “Drita” të vizitojnë Kuvendin dhe të marrin pjesë në një përvojë të veçantë parlamentare.

Në fund të reagimit, Adili-Emini ka falënderuar Kuvendin dhe Institutin Parlamentar për mikpritjen, ndërsa ka përmendur edhe reagimin publik të këshilltares komunale Syarta Saliju Osmani, duke theksuar rëndësinë e transparencës dhe informimit të drejtë të qytetarëve.

Rasti mori vëmendje publike pasi në mirënjohjen zyrtare emri shqip i qytetit ishte zëvendësuar me emërtimin “Kichevo”, duke nxitur reagime për respektimin e gjuhës shqipe dhe të emërtimeve në institucionet shtetërore.

/tvgurra