Kërçova e para në gjuajtjen e derrave të egër.. (VIDEO)

Gjuetarët e përmbyllën sezonin e gjuetisë me organizimin e zënies në kurth të kafshëve të egra. Në vendin e ashtuquajtur “Gorica” sot dolën rreth 100 gjuetarë, të cilët u ndanë në grupe dhe formuan rrethimin e vendit, derisa një grup tjetër me pajisjet e nevojshme po organizonte shtyrjen e kafshëve drejt pritës.

Pasi periudha e gjuetisë ka përfunduar në fund të janarit, sot gjuetarët kishin të drejtë të gjuanin vetëm ujq dhe dhelpra. Por atje u panë edhe kafshë të tjera si derra të egër, mace të egra dhe kaproj, por gjuetarët nuk i vunë në shënjestër.

Kryetari i shoqatës “Eko Fazan”, Kujtim Çodari, tha se në këtë sezon kanë vrarë 50 derra, ndërsa në gjithë Kërçovën janë vrarë 5 ujq.
Kujtim Çodari, kryetar i shoqatës “Eko Fazan”

“Sot shoqata “Eko Fazan” organizon një gjueti të përbashkët të të gjitha grupeve, ku të gjithë bashkërisht kemi kapur një teren që e quajmë “Gorica” dhe do të bëjmë një ndjekje të gjuetisë që të mund të gjuhet vetëm ujku edhe dhelpra”.

Ish-kryetari i kësaj shoqate Qerim Halili tha se Kërçova ka terren të mirë.
“Terrenet janë të mira, sidomos në pjesën veriore të Kërçovës, janë të përshtatshme për gjuetinë dhe janë mjaft të pasura me kafshë të egra si derri egër, ujkun, dhelprën, macen e egër edhe ariu kohëve të fundit si dhe rrëqebulli”, pohoi Qerim Halili, anëtar.

Esat Rexhepi nga ministria e Bujqësisë që morri pjesë në gjuetinë e sotme, tha se gjithçka është zhvilluar në bazë të ligjit, ndërsa theksoi faktin se Kërçova e ka vendin e parë në Maqedoni për vrasjen e derrave të egër.

“Ka shumë terrene, por ky tereni këtu në “Eko Fazan” është një teren shumë i mirë për shkak se përfshinë të gjitha egërsirat. Edhe zyrtarisht e para në Maqedoni për vrasjen e derrave të egër”, pohoi Esat Rexhepi, Ministria e Bujqësisë.

Në këtë përmbyllje sezoni pjesëmarrës ishin edhe disa përfaqësues të organizatave nga qytete tjera të vendit.
“Gjuetia i ka të mirat e veta që më në fund të bashkohemi dhe të ndajmë përvojat tona të cilat ishin në këtë ditë të suksesshme gjahu”, pohoi Shpëtim Xhelili, shoqata “Mufllon”

Ajo që binte në sy ishte interesimi i të rinjve për gjuetinë. Shoqata “Eko Fazan” është themeluar në vitin 2000. Numëron 180 anëtarë kryesisht të moshave të reja.

VIDEO:

/tv21