Fjalimin drejtuar përfaqësusve të Komunës së Kërçovës – në emër të bl Shutovë

Të nderuar të pranishëm,
Të nderuar përfaqësues të Komunës së Kërçovës,
Ne, si Bashkësi Lokale e Shutovës, jemi përgjigjur kësaj thirrjeje jo për të paraqitur kërkesa të reja për vitin 2027, por për të marrë përgjigje për kërkesat që kemi dorëzuar për vitin 2026.

Është e pakuptimtë të na ftoni për të paraqitur kërkesa të reja për vitin e ardhshëm, ndërkohë që për shumë probleme të vitit aktual nuk është ndërmarrë asnjë hap konkret.

Prandaj, dëshirojmë t’ju pyesim drejtpërdrejt: **A janë shqyrtuar kërkesat tona dhe çfarë është bërë konkretisht për realizimin e tyre?**

Po i përmend disa nga problemet kryesore:
**Së pari, *uji i pijshëm.** Rezervuari është në gjendje shqetësuese, si për nga kapaciteti, ashtu edhe për nga pastërtia. Dy fshatra me rreth 3.000 banorë dhe një numër të konsiderueshëm bagëtish varen nga ky furnizim. Pas vendimit të mëparshëm për ndalimin e përdorimit të ujit për pije, çfarë masash janë ndërmarrë? A është vërtetuar me analiza se uji është i sigurt për konsum? Për këtë çështje kërkojmë përgjigje të qartë dhe zyrtare.

**Së dyti, Një pjesë e fshatit ende nuk ka ndriçim, edhe pse banorët paguajnë rregullisht detyrimet përkatëse. Kërkojmë të dimë pse nuk është zgjidhur ky problem dhe kur mund të presim realizimin e tij.

**Së treti, rrugët lokale.** Kemi kërkuar shtrimin me asfalt ose bekaton të disa segmenteve të rrugëve lokale, me gjatësi të përgjithshme rreth një kilometër. Po ashtu, kemi kërkuar rregullimin e ujërave që dëmtojnë rrugën dhe vështirësojnë qasjen e banorëve drejt varrezave të fshatit. Dëshirojmë të dimë nëse këto kërkesa janë shqyrtuar dhe nëse parashihen në planin e investimeve të komunës.

Të nderuar përfaqësues,
Ne e kuptojmë se jo çdo problem mund të zgjidhet menjëherë, por presim që çdo kërkesë të marrë përgjigje dhe të ketë një plan konkret për realizim.

Prandaj, kërkojmë që të na informoni zyrtarisht për statusin e kërkesave të vitit 2026, për masat e ndërmarra dhe për mundësitë e përfshirjes së projekteve të parealizuara në planifikimin për vitin 2027.

Qëllimi ynë nuk është të krijojmë përplasje, por të bashkëpunojmë për të mirën e qytetarëve. Megjithatë, bashkëpunimi duhet të sjellë rezultate konkrete, jo vetëm diskutime.

Ne nuk jemi këtu për të bërë shou apo për të paraqitur çdo vit të njëjtat kërkesa. Jemi këtu për të kërkuar zgjidhje për problemet e qytetarëve tanë.**
Prandaj, kërkojmë përgjigje zyrtare, angazhim konkret dhe realizimin e kërkesave tona sipas mundësive dhe prioriteteve të komunës.
Ju faleminderit! Shkruan Shefik Azizi

/ms