Kërçovarja Jeta Aliu promovon librin e saj në Shkup: Një ëndërr e bërë realitet

Jeta Aliu ka ndarë një mesazh mirënjohjeje pas promovimit të librit të saj në Fakultetin Filologjik “Blazhe Koneski” në Shkup, duke e cilësuar këtë arritje si realizimin e një ëndrre dhe fryt të një rrugëtimi të gjatë me studim, përkushtim e sfida.

Në mesazhin e saj, Aliu falënderon fillimisht Zotin për forcën, durimin dhe shëndetin, ndërsa familjes i kushton një falënderim të veçantë për dashurinë dhe mbështetjen e vazhdueshme.

Mirënjohje shpreh edhe për dekanin, prof. dr. Vladimir Martinoski, shefen e Katedrës së Albanologjisë, dr. Mirushe Hoxha, si dhe recensentët e librit: dr. Ajtene Qamili Hajdari, dr. Berton Sulejmani dhe dr. Arbër Çeliku. Ajo vlerëson kontributin e tyre profesional dhe mbështetjen akademike për botimin.

Në falënderimin e saj, një vend të veçantë zënë edhe kolegët, nxënësit, miqtë dhe familjarët që ndanë me të emocionet e këtij promovimi të parë.

“Sot nuk festoj vetëm botimin e një libri, por edhe forcën për të mos u dorëzuar, besimin për të ecur përpara dhe dashurinë për dijen që më ka udhëhequr deri këtu”, shkruan Aliu.

Përmes këtij mesazhi, ajo e përshkruan botimin si një kapitull të veçantë të jetës së saj, të shënuar nga puna këmbëngulëse dhe përkrahja e njerëzve që i qëndruan pranë.

/kercova.net