Fytyra e popullit tim poezi nga Dr. Arbër Çeliku

Përditë e shoh fytyrën e popullit tim
E ngrysur
E zbehtë
Me buzëqeshje të ngrirë
Të prerat në faqe të thella i ka
Flet shumë
Por, nuk thotë asgjë

Fytyrë pa shprehje
E heshtur si gur varri
Fytyrë mijë vjeçare
Në çdo rrudhë bart një histori
Sa të dhimbshme aq edhe të pashpresë

Shikim i trishtë
I përhumbur në kohë dhe hapësirë
Përplot ëndrra shekullore
Të tashmen nuk e shijon
Kurse të ardhmen nuk e percepton dot

Fytyrë që s’pret asgjë
E fiksuar në një pikë
Nuk i bën përshtypje më as dita dhe as nata
E marrosur nga tradhtia në vazhdimësi
Për pak dritë
Për lirinë e premtuar
Shtojzovallen
Që nuk i erdhi kurrë

Cërvicë, 7 janar 2022
Shkruar nga Dr Arbër Çeliku

/ms