Ç’JANË KËTO RRUGË.. Poezi nga Kujtim Shabani

Ç’JANË KËTO RRUGË
Ç’janë këto rrugë, rrugë të gjata –
më të zeza se vetë nata
Ç’janë këto rrugë, mos i zëntë drita –
plot pusi, plot me prita

Ç’janë këto rrugë, larë me gjak –
nisesh burrë e s’bëhesh plak
Ç’janë këto rrugë, mos qofshin kurrë –
nisesh djalë e s’bëhesh burrë

Ç’janë këto rrugë, i ngrëntë mortja –
s’dinë për nëna, s’dinë për motra
Ç’janë këto rrugë, që s’çahen dot –
as në këmbë, as me not

Ç’janë këto rrugë, që hanë kokë –
sa për qiell, sa për tokë
Ç’janë këto rrugë…

/ms