U premtua e u promovua disa herë! Salla në Greshnicë nuk po hapet.. (VIDEO)

Kjo është salla e sportit e ndërtuar në SHF “Faik Konica” në fshatin Greshnicë të Kërçovës. Gurthemeli i kësaj salle u hodh në qershor të vitit të kaluar dhe premtimet e atëhershme ishin se në afat prej 7 muajve, nxënësit do ta shfrytëzojnë për aktivitete sportive dhe shkollore.

“Të hedhim gurthemelin në shkollën fillore të fshatit Greshnicë, me çka bëhet fjalë për një investim konkret rreth 24 milion denarëve dhe të gjitha aktivitet për ndërtimin e kësaj salle sportive duhet të kryhen brenda periudhe kohore prej 7 muajsh që d.m.th. për vitin e ardhshëm shkollor, salla sportive do të jetë funksionale dhe në shërbim të nxënësve”, deklaroi më datë 11.06.2020, ministri i atëhershëm i Arsimit, Arbër Ademi.

Në bazë të premtimeve nxënësit duhej që në janar të këtij viti t’i zhvillojnë aktivitetet sportive në këtë sallë, por salla ende nuk është hapur për nxënësit, madje gjatë fushatës parazgjedhore të zgjedhjeve lokale e njëjta u promovua nga figurat politike vendore.

Por nxënësit ende lëndën e edukatës fizike e kryejnë në oborrin e shkollës. TV21 pyeti përgjegjësin e arsimit të Komunës, se ku qëndron problemi që edhe pas më shumë se një viti e gjysmë nga vënia e gurthemelit salla nuk po hapet!? Ai tha se vonesa ka ardhur si pasojë e përforcimit të sistemit kundër zjarreve.

“Kishim një pengesë të vogël, bëmë përforcimin e gypit të ujit i cili sjellë ujë deri te hidrantët, dhe për çështje sigurie që nxënësit të jenë sa më të sigurt, mos kemi problem me zjarret ne bëmë përforcimin e gypit dhe plotësimin e sasisë së ujit që shkon te hidranti që përdoret kundër zjarrit”, tha Emin Nasufi, përgjegjës i Sektorit për arsim në Kërçovë.

Salla ka një sipërfaqe prej 1000 m2, dhe kap vlerën 24 milionë denarë, ndërsa siç thanë nga Komuna e Kërçovës pritet që së shpejti të bëhet edhe hapja solemne e sallës së sportit në fshatin Greshnicë.

VIDEO:

/tv21