Kërçovë prerje masovike e druve në fshatin Kollarë.. (VIDEO)

Me ardhjen e sezonit dimërorë fillon edhe shkatërrimi i maleve nga prerja e pa kontrolluar e drunjëve.
Pas disa ankesave se po priten drunjtë e malit nga banorët e fshatrave Kollarë dhe Tajmisht të Kërçovës TV21 doli në teren.

Dhe pamja kur arritëm atje ishte kjo…
Drunjë të prerë dhe të bërë gati për t’i shitur.

Siç mund të shihni pjesa e poshtme e kësaj ane e malit ishte prerë tërësisht dhe vazhdonte të pritej, duke mos lënë as drunjtë e njomë që të rriten.

“Si çdo herë gjatë sezonit dimërorë, priten drunjtë nga mali për tu furnizuar të gjitha shtëpitë me drunjtë për ngrohje, këtu jemi mbi fshatin Kollarë dhe fshati Tajmisht në malin e këtij fshati, ku siç mund të shihet është prerë tërësisht një pjese e madhe e malit”, raporton gazetarja Salije Sadiku.

TV21 mësoi se në Malin e fshatit Kollarë drunjtë i pret një kompani nga Gostivari e cila i shet në Gostivar dhe Tetovë. Ne kërkuam qëndrim nga Drejtori i NP”Llapushnik” dhe ai tha se kanë bërë marrëveshje më një kompani nga Gostivari dhe e gjithë kjo sepse Tetova dhe Gostivari kanë mungesë për drunjtë për ngrohje.

“Ja kemi fiksuar ku duhet të presë, ku ka prerë, ja kemi nënvizuar dhe duhet të pres në kufijtë e të lejuarës.Ne japim edhe nga Ohri në Gostivar edhe nga Struga sepse Gostivari dhe Tetova ka mungesë të drunjtëve”, tha për TV21, Zoran Krsteski – drejtor i NP “Llapushnik”.

Edhe pse pamjet e TV21 flasin vetë për gjendjen në të cilën gjendet mali mbi fshat dhe nuk është lënë asnjë dru i vetëm në këtë pjesë, drejtori i NP”Llapushnik” Kërçovë thotë se nuk është e vërtet se mali është shkatërruar dhe përbën rrezik për fshatrat që janë poshtë malit.

TV21: Por atje ishte shumë i shkatërruar, një pjesë ishte shumë e prerë?
Zoran Krsteski: “Jo Jo, jo, ai pret pastër”.

Qyteti më i prekur më prerjen e drunjëve në mënyrë ilegale nga pylli është Kërçova. Në janar të këtij viti hulumtimet e Eurothink shpalosën të dhënat nga viti 2010 deri në vitin 2019 nga ku tregojnë se bëhet fjalë për veprimtari të organizuar kriminale ku grupe serioze kriminale me hierarki dhe strukturë arrijnë të akumulojnë një sasi të madhe të prerjeve të egra ilegalisht. Ata thonë se në këtë veprimtari ilegale janë të kyçur edhe figura të fuqishme politike.

Në raportin e fundit të EuroThink flitet për dëmin e një shume prej 300.000 mijë eurove që i është bërë filialit “Llapushnik “ Kërçovë, për shkak të keqpërdorimit të pozitës zyrtare për një drejtor dhe disa të punësuar, por që rasti mbeti nën hije edhe sot e kësaj dite. Në janar nga MPB thanë se ka ngritur padi penale, ndërsa nga gjykata thanë se nuk arritur asnjë lëndë deri tek ata.

VIDEO:

/tv21