Nëse humbet Kërçova fajtor jan BDI dhe Fatmir Dehari..

Të dashur kërçovarë, vëllezër e motra, votues, sipmatizantë dhe mbështetës të kandidatit tonë, dëshirojmë me këtë rast tju bëjmë me dije disa momente që kaluam bashkë në këtë fushatë zgjedhore. Ju jeni të gjithë dëshmitarë se ne u përballëm me dy parti në pushtet të cilat udhëhoqën një kampanjë të egër kundër nesh duke i keqpërdorur të gjitha benefitet që i ofron pushteti, zyrat e shtetit, makinat zyrtare, paratë tuaja të vjedhura, telefonat zyrtarë, shantazhet, kërcënimet, zhvatjet, presionet, joshjet etj, etj. Sipas të dhënave tona në kampanjë për të blerë vota kanë shpenzuar shumë të madhe parash. Por po i lejmë në një anë të gjitha këto.

Të dashur qytetar të Kërçovës, Ju neve na keni nderuar dhe na keni obliguar me 4500 vota shumë të sinqerta dhe shumë të pastra, pa presione, pa blerje vote, pa zhvatje, pa trysni e presione të llojit jo të largoj nga puna e jo të gradoj në punë, vota të pastra si loti. Ju jemi mirnjohës përjetë. Ju vërtet keni besuar në opsionin tonë politik, opsion që tentoi ta zbusë dhe ballansojë klimën e acaruar politike në Kërçovë. Lirisht mund të themi se e kemi lexuar me shumë menquri rezultatin e zgjedhjeve.

Elektorati dha një porosi, duke na falur besimin e 4500 votave të pastra, por njëkohësisht u dëshmua që shumica duan të jenë me pushtetin, i cili shantazhon çdo ditë me shpresën se një ditë do t’u hedhë një kockë. I sigurojmë që votën e Tyre e kanë dhënë gabim dhe se oligarkët partiak do t’I trajtojnë edhe më zi se deri tani.

Pushteti pastaj vazhdoi me të veten duke ngritur një kurth tjetër për ne, gjoja se ne qënkeshim një zgjatim i VMRO-së. Kategorikisht e hedhim poshtë me indinjatë. Ne nuk i hamë këto broçkulla, as edhe qytetarët sduhet ti hanë. Lojërat me patriotizëm folklorik, me patriotizëm të rrejshëm që i duhet klasës politike vetem në kohë zgjedhjesh dhe pastaj bejnë krushqi edhe me djallin vetëm e vetëm të mbajnë pushtetin, kanë mbaruar. Të gjithë qytetarët e kanë të qartë këtë. Këtë e ka mësuar shumë mirë votuesi në Kërçovë.

Ata dëshirojnë përkrahjen dhe votën tonë, por duke na defaktiorizuar. Duan votën, por nuk na duan neve. Të njejtën e konfirmoi publikisht vete Dehari në emisionin në Tv Klan Maqedonia. Tani të dashur qytetar po ju pyesim publikisht, nëse ne si faktor zero, pa asnjë vlerë nominale, si mund të jemi fajtor nëse BDI-së nuk i dalin votat dhe e humb Kërçovën e shumë vuajtur si që e proklamojnë ata? Kujt do i bie përgjegjësia? Sigurisht jo neve.

U apelojmë për të fundit herë, që të mësohen të respektojnë votën, sidomos votën kundër tyre, të reflektojnë dhe ta pyesin veten pse u ndodhi kjo rënie drastike? Nga 17200 vota para katër vitesh, duke qenë pushtet absolut të biesh në 8500 dhe të humbësh nga trupi votues edhe 4500 vota që ishin për ne, kjo do duhej të ishte një kambanë alarmi i fuqishem për ata, që u tregon se u ka ardhur koha seriozisht të reflektojnë. Nuk e kanë luksin e të sjellurit si kapadahinjë, sepse janë në rënie të lirë.

Për sa i takon rrethit te dyte zgjedhor, shtabi ynë elektoral i ka analizuar të gjitha rrethanat dhe momentet. Votat që na i dhanë qytetarët tanë ishin vota besimi, ata na besuan neve dhe ne skemi të drejtë të tregtojmë me votat e tyre. Prandaj u apelojmë të gjithë atyre që na kanë votuar neve, të votojnë me vetëdijen e tyre të pastër, me ndërgjegje të plotë për atë kandidat që ata besojnë se nesër do u shërbejë më mirë. Shqiptarët e Kërçovës e dijnë se për kë duhet të votojnë shumë më mirë se konjukturat e tanishme politike komunale.

Dhe do e bëjnë. Sepse mundi dhe sakrifica e shqiptarëve në vitin 2013 ishte investim vetëm i tyre që i pari i qytetit ua keqpërdori. Dhe i vetmi fajtor po ndodhi (larg qoftë) humbja e Kërçovës do jetë Fatmir Dehari dhe ca mercenar tjerë rreth tij, sepse dështoi në menaxhimin e qytetit duke fyer, anashkaluar, injoruar dhe ofenduar të gjithë njerëzit e sinqertë në këtë qytet, nuk i dha udhë meritokracisë por i zgjati dorën makutërisë dhe servilizmit dhe se BDI-në e kanë bërë filial të LSDM-së.

Sot më pak se kurrë nuk do duhej të diskutohej nëse e humbim apo jo Kërçovën. Tetë vjetë kryetar i komunes dhe ta sjellësh në këtë dilemë shqiptarin së pari të Kërçovës dhe pastaj të gjithë qytetarët e sajë, është një qyqarllëk i llojit të vet. Kjo është dështim e jo fitore z. Dehari. Bëhu burrë dhe mbajë përgjegjësi.

Për ne zgjedhjet lokale përfunduan sot, do vazhdojmë betejën në Këshillin e Komunës me tre Këshilltarët tonë të mrekullueshëm. Do bëjmë opozitën konstruktive kur të jetë e nevojshme dhe do bëjmë pushtetin e drejtë po ashtu kur të jetë e nevojshme për të gjithë banorët e Kërçovës.

Ju faleminderit!
25 Tetor, 2021
Kërçovë
Shtabi zgjedhor i Kandidatit të pavarur për Komunën e Kërçovës Fatmir Limanit

/news33