Çeliku: Kandidimi i Fatmir Limanit vjen në moment të rëndësishëm për Kërçovën..

“Këto 3 dekada demokraci, gjithsesi që kanë krijuar rrethana të përçudnuara shoqërore, të shoqëruara me një dëshpërim kolektiv, në vend që të mësonim nga e kaluara e hidhur, e karakterizuar me regjime diktatoriale, komuniste-centraliste dhe hibride”.

Ky është vlerësimi i profesorit universitar, Arbër Çeliku, lidhur me zhvillimet e fundit në vend e në veçanti në Kërçovë. “Në të vërtetë, ka ndryshuar forma e qeverisjes, por jo edhe përmbajtja. Të njëjtat metoda nga sistemet e shkuara politike u zbatuan edhe këto 3 dekada: diferencim i skajshëm, dëbim masiv i popullatës, degradim i arsimit, shëndetësisë, kulturës, etj.

Në këto ndërthurje, gjithsesi se më e madhe është pakënaqësia kolektive, se sa tendenca për një përqafim të politikave progresive, që neve na kanë munguar në vazhdimësi. Për të qenë më i saktë, kjo mënyrë e të bërit politikë ka shkaktuar një krizë të madhe si normative, ashtu edhe morale gjithandej në viset tona. Janë proklamuar reforma pompoze, që u joshën vetëm me vende partiake pune (jokonkurruese), por që shpien deri në një çrregullim të dukshëm të ekonomisë, drejtësisë, shëndetësisë, arsimit dhe kështu me radhë”, shprehet Çeliku.

Ajo që është më evidente nga kjo mënyrë e të bërit politikë, Çeliku thotë se në diskursin publik njihet si pabarazi sociale, e cila domosdoshmërisht shtrëngon pjesën e paprivilegjuar të popullatës (sidomos të rinjtë, që rriten me implikatura të tjera shoqërore) të dynden në vende të tjera për një jetesë më të mirë.

Në këto kushte, ai shton se gjithsesi që lind një tendencë alarmante për ndryshim, përmirësim dhe progres shoqëror. Sa i përket Kërçovës me rrethinë si regjion e mentalitet, analisti Arbër Çeliku konstaton se ajo historikisht shquhet për papërulësi ndaj pushtuesve të ndryshëm, pararojë e vlerave kombëtare dhe abortimin e së ligës.

“Dua të them se shqiptarët e Kërçovës historkisht kanë paguar shumë, duke qenë ferrë në sy e pushtetit jugosllav dhe më vonë të atij maqedonas dhe kërçovarët janë tepër të ndjeshëm ndaj çështjeve kombëtare dhe atyre që prekin mirëqenien e tyre. Sado që të proklamohet një menaxhim i suksesshëm i komunës për 8 vjet, në opinionin publik dihen shumë gjëra: Kush e kontrollon mafinë urbane, tenderimet, punësimet, avancimet e privilegjet e shumta komunale, që ndërlidhen ngushtë me përkatësinë politike. Kandidimi i z. Fatmir Limani vjen pikërisht për këto arsye normative dhe morale, aq më tepër kur subjekti politik i quajtur BDI nuk arrin ta kuptojë thelbin e demokracisë, që konsiston në një konsumim të shpejtë publik.

Mjafton ta kenë lexuar thënien e Xhorxh Uashingtonit, i cili pas dy mandatave tërhiqet nga politika, duke iu përgjigjur pyetjes së gazetarëve se përse nuk e ndryshon kushtetutën dhe të kandidojë për një mandat të tretë: “Ju më thoni të bëhem mbret mua, që unë e zhbëra mbretërinë?!

Çdo amerikan mund të jetë një Xhorxh Uashington””, vlerëson analisti Arbër Çeliku. Ai shton se personalisht nuk është i afërt me asnjërin prej kandidatëve për kryetar komune, por mendon se z. Limani, përveç që është një djalë dëshmori, ai familjarisht zotëron vlera të mirëqena kombëtare.

“Fatmir Limani pas vete nuk ka asnjë skandal, që do ta diskreditonte figurën e tij me këtë rast. Ndër të tjera, kush i ka ndjekur zhvillimet në rrafshin diakronik brenda subjektit politik BDI, ai ka qenë mbase i vetmi zë kritik, që e bën paksa më të besueshëm në qëllimin e tij të tanishëm. Z. Fatmir Limani, duke zotëruar atributet e lartpërmendura, por edhe duke qenë pjesë sistemore e politikëbërjes për një kohë të gjatë, ka arritur t’i shkaktojë kokëçarje BDI-së në Kërçovë, duke ia marrë një pjesë të konsiderueshme të anëtarësisë, por edhe duke siguruar edhe një mbështetje të madhe të mërgatës kërçovare, e cila përfaqëson rreth gjysmën e popullatës shqiptare të Kërçovës”, deklaroi Çeliku.

Sido që të jetë rrjedha e ngjarjes, profesori Arbër Çeliku thotë se në rrethin e dytë zgjedhor, të dy kandidatët duhet të shfaqin maturi dhe vetëdije të lartë dhe ta mendojnë më të mirën për qytetarët e Kërçovës, duke treguar, në radhë të parë unitet, që Kërçova të mbesë përsëri në duart e shqiptarëve.

/gazetaexpress