Pa din e iman.. Nga Arbër Çeliku

Pashë të rinj
Që s’kanë respekt për babë e nënë
Dhe vrasin e presin për liderin e partisë
Të vjen për të qarë
Por kot

Pashë intelektualë e profesorë
Që shesin moral e edukatë para auditorit përplot
Nga vrulli i fjalës thupra u bëhen damarët në fyt
Servila e puthadorë par excellence
Kur vjen në pyetje partia
Haj medet!

Pashë artistë, këngëtarë e poetë
Duke i thurur këngë e poezi partisë
Për një torbë taxhi
Ta mbushin pak atë grazhd bosh
Që nëna parti thatë ua la ndër vite
Gjynah!

Pashë edhe hoxhallarë
Me qallmën hakaret
Predikime të zjarrta mbi humanizmin dhe hyjnoren
Teksa u rreshtuan pas dexhallit
Temena duke i bërë politikës
Haram u qoftë!

Pashë e ç’nuk pashë
Në këtë shoqëri hallakamë ndër vite
Një fjalë askush nuk e tha
Glorifikuam të ligën
Njerëz kasaba
Që s’kanë as din e as iman

Arbër Çeliku – Cërvicë, 26.9.2021
Fotoja e lajmit është përzgjedhje e redaksisë dhe ska të bëjë me autorin.

/ms