Kërçova në artin popullor dhe zanatet nga Dr. Qemal Murati

Një fushë me rëndësi të jetës materiale e mendore kërçovare përbën edhe ajo e artit popullor të punimit me dru, me gur e me metal, të mjeshtërve të shquar të kësaj rrethine, si dhe ajo e punimit në tullar (vek), me shtizë e me gjilpërë mbi pëlhurë që thurin gratë, të cilat dëshmojnë për vlera te holla artistike.

Shqiptari, siç e ka pohuar edhe Edit Durhami, është artisti i Ballkanit.

Në këtë kuadër nuk mbetet prapa edhe shqiptari i Kërçovës, i cili ka ditur të punojë me shije të hollë artistike çdo gjë që i është nevojitur atij, enë e orendi shtëpiake: lugë druri, lugtare, kriptare, palare, tryezë, tëpi, tinar (kacë), mangje, djepe, arka, çerepë, dollapë, dyer, shporta, furkë, tullar (vek)-me të gjitha pjesët e tjera që e shoqërojnë atë; vegla bujqësore: zgjedhë, plug, brenë (lesë), qerre, vreçallkë, tezgere (lese), fturk (furk), greballë (grabujë), samar etj.

Po ashtu të njohur kanë qenë edhe mjeshtërit që kanë punuar me gur, sidomos në ndërtimin e shtëpive të tipave të ndryshme, kasolleve, avllive (rrethojave me mur), dhe sidomos mjeshtërit në punimin e arit dhe argjendit, ndonëse këta të fundit kanë qenë më të pakët dhe këtë zeje kanë filluar ta ushtrojne më vonë.

Nga zejet e ndryshme që kanë ushtruar mjeshtërit kërçovarë të dorës shqiptare mund të penendim këtu edhe: samarxhinjtë, terzinjtë, qeleshepunuesit, farkëtarët, zdrukthëtarët, muratorët etj.

Në fushën e artit popullor nuk kanë mbetur prapa burrave as gratë, të cilat me shkathtësinë dhe invencionin e tyre të stërholluar kanë bërë lloj-lloj punimesh në pëlhurë: qilima, floke, çorape etj., me motive artistike nga më të hollat.