Trump e quajti Fauçin – “katastrofë”: Njerëzit janë të lodhur nga Kovid-19
Gjatë bisedës konferenciale me ekipin parazgjedhor, presidenti amerikan, Donald Tramp i bëri kritika të ashpra ekspertit për sëmundje ngjitëse, Entoni Fauçi, duke e quajtur atë “katastrofë” dhe se “njerëzit janë të lodhur nga Kovid-19”. Këtë e lajmëruan mediumet amerikane të cilat u referohen deklaratave të gazetarëve të cilët e dëgjuan bisedën.
“Njerëzit janë të lodhur nga koronavirusi”, tha presidenti, sipas gazetarëve të cilët e dëgjuan bisedën. “Njerëzit u lodhën duke e dëgjuar Fauçin dhe tërë ata idiotë”, vazhdoi Donald Tramp.
Presidenti shtoi se Fauçi, i cili e udhëheqë Institutin nacional për alergji dhe sëmundje ngjitëse prej vitit 1984, është “njeri i këndshëm”, por ai është “këtu qe 500 vite”.
Shefi i shtetit gjithashtu tha, por pa siguruar dëshmi, se do të kishte 800.000 raste të vdekjes nga koronavirusi në SHBA, nëse ai do t’i kishte ndjekur këshillat e Fauçit.
“Fauçi është katastrofë”, theksoi Trampi.
Në intervistë për televizionin amerikan, eksperti për sëmundje infektive komenton se “nuk ishte fare i befasuar” që Trampi ishte infektuar me koronavirus sepse kishte organizuar ngjarje masive me masa minimale për distancë sociale dhe mbajtje të maskave disa ditë para se të sëmurej.
Anketat e mendimit publik tregojnë se amerikanët më shumë i besojnë ekspertit se sa presidentit. Një studim nga Njujork Tajms / Siena kolexh në qershor tregoi se 67 për qind e amerikanëve kanë besim tek Fauçi si burim i informatave për pandeminë. Vetëm 26 për qind e thonë të njejtën për Trampin.
/ts