Kërçovë: Shkolla e Cërvicës e kalbur përbrenda ! (VIDEO)

E lyer, e ngjyrosur, e vizatuar por në të vërtetë prej te themelet e deri te çatia është e kalbur.
Ky është objekti i shkollës periferike “Millto Gurra” në fshatin Cërvicë të Kërçovës.
Kjo shkollë është ndërtuar në vitet e 70-ta nga vetë banorët e fshatit dhe që atëherë shumë gjenerata janë arsimuar në këtë objekt.

Drejtori i shkollës Kujtim Kasami tha se në vitin 2017 kanë bërë kërkesë deri te Ministria e Arsimit për ndërtimin e një godine të re, dhe me shpresë se kërkesa e tyre do të plotësohet, pjesën e jashtme të objektit nuk e kanë rinovuar.

“Ne nuk jemi fokusuar shumë në pjesën e jashtme për arsye sepse kemi dëshirën dhe shpresojmë që një ditë të kemi objekt të ri shkollorë në atë vendbanim, gjithmonë fokusimi jonë ka qenë që objekti të mirëmbahet të pastrohet të rregullohet me nxehje qendrore njëkohësisht edhe me rrejt të internetit dhe me të vërtetë brenda për brenda objekti I plotëson kushtet për të vijuar një mësim të rregullt edhe atë në dy ndërrime,- tha Kujtim Kasami, drejtor i shkollës “Millto Gurra”.

Kryetari i komunës së Kërçovës Fatmir Dehari tha se kanë hartuar projekt për këtë shkollë dhe e kanë dërguar në MASH dhe presin miratimin e të njëjtit.

-“Komuna e ka hartuar projektin, ka leje ndërtimi projekti. Kemi aplikuar dhe unë shpresoj që ne të arrimë deri në fund të vitit apo fillim vitin e ardhshëm të fillojmë ndërtimin e shkollës. Por gjithsesi në kushtet që është tani shkolla mund të them se i plotëson të gjitha standardet për mbarëvajtjen e procesit edukativo arsimor,- deklaroi Fatmir Dehari, kryetar i Komunës së Kërçovës.

Ndërtimi i kësaj shkolle prej vitesh është edhe kërkesë e banorëve të këtij fshati. Në këtë shkollë mësimin e ndjekin 43 nxënës të fshatit nga klasa e parë deri në të nëntën në dy ndërrime.

VIDEO:

/tv21