Në shumë fshatra të Kërçovës rregullohet infrastruktura rrugore

Këto ditë po intensifikohet puna në shumë rrugë, kryesisht në pjesën rurale të Komunës së Kërçovës. Shumë rrugica në fshatra sanohen, si për shembull në Zajas-Teqe, pastaj në Strogomishtë të Poshtme, Baçishtë, Knezhinë, Kolibar dhe Garan.

“Pothuajse të gjitha rrugët kryesore që e lidhin pjesën urbane të komunës me fshatrat janë asfaltuar, sepse tani kemi filluar t’i shqyrtojmë kërkesat për rregullimin e rrugicave në suaza të fshatit.

Sipas prioritetit përpiqemi t’i sanojmë rrugicat përkatëse të cilat në të vërtetë kërkojnë sanime të menjëhershme. Punojmë në rregullimin e shumë rrugicave në fshatrat Zajas-Teqe, Strogomishtë të Poshtme, Baçishtë, Knezhinë, Kolibar dhe Garan. Një pjesë e rrugëve asfaltohen, ndërsa një pjesë rregullohen me pllaka bekatoni, në varësi të kërkesës dhe konfigurimit të terrenit ku punohet”, deklaroi Burim Kadriu nga Komuna e Kërçovës.

Shtoi se do të vazhdojnë t’i përmbushin kërkesat dhe të intervenojnë në vazhdimësi sipas asaj që mund të konsiderohet si më urgjent për t’u rregulluar, që do të varet edhe nga kushtet klimatike.

“Punët infrastrukturore në pjesën rurale janë bërë dhe po bëhen nga buxheti komunal”, theksoi Kadriu.
/koha.mk