Kërçovë: Kallëzim penal ndaj një 17-vjeçari, policia i gjen marihuanë gjatë kontrollit !
Policia e Kërçovës ka ngritur kallëzim penal ndaj një të mituri 17-vjeçar nga një fshat i Kërçovës, nën dyshimin për përfshirje në veprimtari të paligjshme që lidhen me drogat narkotike.
Sipas informacioneve të publikuara nga policia, Njësia e Punëve të Brendshme (NJPB) në Kërçovë ka paraqitur kallëzim penal ndaj 17-vjeçarit, për shkak të dyshimeve të bazuara se ka kryer veprën penale “Prodhimi i paautorizuar dhe lëshimi në qarkullim i drogave narkotike, substancave psikotrope dhe prekursorëve”.
Gjatë një kontrolli të ushtruar nga nëpunësit policorë të sektorit të policisë kriminalistike, tek i mituri janë gjetur dhe konfiskuar marihuanë, si dhe sende të tjera në të cilat janë konstatuar mbetje të kësaj substance narkotike.
Pas dokumentimit të rastit, ndaj 17-vjeçarit është paraqitur kallëzim penal pranë organeve kompetente.
I mituri mbetet i dyshuar për veprën penale të përmendur, ndërsa përgjegjësia e tij penale duhet të përcaktohet përmes procedurave përkatëse ligjore.
/ts
>
