Droni i policisë zbulon hajdutin shqiptar në arrati, arrestohet 35-vjeçari në Zvicër !

Droni i policisë zbulon hajdutin shqiptar në arrati, arrestohet 35-vjeçari në Zvicër !

Një shtetas shqiptar, 35 vjeç, është arrestuar në kantonin Zug të Zvicrës, pasi dyshohet se kishte hyrë me forcë në një banesë dhe më pas ishte larguar. Një dron policor e lokalizoi dhe ndoqi lëvizjet e tij deri në arrestim.


Kur patrullat mbërritën në vendngjarje, i dyshuari ishte larguar nga banesa. Policia nisi menjëherë kërkimet në zonën përreth, duke aktivizuar edhe një dron të Policisë Kantonale të Zugut.

Pajisja identifikoi një person të dyshimtë në një fushë në lindje të pronës ku ishte raportuar incidenti. Sipas policisë, ai tentoi t’i shmangej vëzhgimit ajror duke u larguar nga fusha dhe duke u fshehur në një zonë industriale.


Megjithatë, pamjet e transmetuara nga droni u mundësuan patrullave në terren të ndiqnin vendndodhjen e tij dhe ta arrestonin. Autoritetet konfirmuan se i ndaluari është një shtetas 35-vjeçar i Shqipërisë.

Prokuroria Publike e kantonit Zug ka nisur hetimet penale dhe ka njoftuar se do të kërkojë caktimin e masës së paraburgimit. Autoritetet nuk kanë bërë të ditur nëse nga banesa është marrë ndonjë send me vlerë. I dyshuari prezumohet i pafajshëm deri në një vendim të formës së prerë nga gjykata.

/ms