Trump drejt Azisë, takim historik me Putinin dhe Xi Jinpingun në Kinë ?
Presidenti amerikan, Donald Trump, po përgatitet të nisë vizitën në Azi, ku në fokus do të jetë një takim i rëndësishëm trepalësh me presidentin rus Vladimir Putin dhe presidentin kinez Xi Jinping. Takimi është konfirmuar nga Ministria e Jashtme e Kinës dhe do të mbahet më 19 nëntor në qytetin Shenzhen, në kuadër të samitit të bashkëpunimit ekonomik të vendeve të Azisë dhe Paqësorit (APEC).
Bëhet fjalë për takimin e parë trepalësh mes liderëve të tri fuqive të mëdha botërore. Në tryezën e diskutimeve pritet të jetë kontrolli i armëve bërthamore dhe mundësia e reduktimit të arsenaleve atomike. Trump ka shprehur interes për arritjen e një marrëveshjeje që do të kufizonte përhapjen e armëve bërthamore në nivel global.
Presidenti amerikan pritet të diskutojë gjithashtu edhe për luftën në Iran, ndërsa zyrtarët amerikanë nuk presin që në këtë takim të trajtohet lufta në Ukrainë. Pekini ka bërë të ditur më herët se çështja e Ukrainës është një konflikt evropian dhe se vendet evropiane duhet të jenë pjesë e diskutimeve për zgjidhjen e tij.
Para udhëtimit në Kinë, Trump do të qëndrojë në Manila të Filipineve, ku do të zhvillojë takime me liderët e vendeve të Azisë Juglindore. Vizita zhvillohet në një moment të ndjeshëm për administratën amerikane, pas humbjeve të republikanëve në zgjedhjet e mesmandatit dhe tensioneve të reja në marrëdhëniet tregtare me Kinën.
Ndërkohë, analistët vlerësojnë se takimi në Shenzhen mund të shërbejë si një mundësi për uljen e tensioneve mes Uashingtonit, Moskës dhe Pekinit, megjithëse nuk pritet që nga bisedimet të dalë menjëherë ndonjë marrëveshje konkrete.
/Alsat.mk
