Bdi Kërçovë: Një vit qeverisje, zero projekte të realizuar !

Dega e Bashkimit Demokratik për Integrim (BDI) në Kërçovë ka reaguar me rastin e njëvjetorit të marrjes së detyrës së kryetarit të Komunës, Aleksandar Jovanovski, duke kritikuar punën e tij gjatë 365 ditëve të para të mandatit. Në reagim, BDI-ja pretendon se nuk është realizuar asnjë projekt kapital dhe kërkon llogaridhënie për premtimet dhe shpenzimin e fondeve publike.

Në vijim, reagimi i plotë i BDI-së në Kërçovë:
Nesër, 10 nëntor 2026, bëhet plot një vit nga dorëzim-pranimi zyrtar i detyrës së kryetarit të Komunës së Kërçovës, nga Fatmir Dehari te Aleksandar Jovanovski.
Gjatë fushatës elektorale, kundër kandidatit të BDI-së, Fatmir Deharit, u zhvillua një luftë speciale, e orkestruar deri në detaje, ku fatkeqësisht u përfshinë edhe ata që publikisht kishin premtuar se në raundin e dytë do të mbështesnin kandidatin shqiptar, cilido qoftë ai.

Pavarësisht gjithë kësaj, Fatmir Dehari tregoi maturi, pjekuri politike dhe qytetari, duke dorëzuar publikisht mandatin, bashkë me procesverbalin që dëshmonte se komuna po kalonte nën udhëheqjen e re pa borxhe, me shumë projekte të realizuara dhe të tjera në realizim e sipër.
Plot 365 ditë më vonë, nga kryetari i ri ende asnjë projekt kapital i realizuar, asnjë premtim i mbajtur. Asgjë, ZERO!

Siç duket, Aleksandar Jovanovski ka harruar se bashkë me “zyrën” mori edhe përgjegjësitë ndaj qytetarëve të Kërçovës. Në këto 365 ditë, ai në asnjë çast nuk ka dëshmuar se është në shërbim të tyre. Përkundrazi, qeverisja e tij ka ngritur shqetësime se po u shërben vetëm interesave të një grupi të ngushtë interesi dhe jo të gjithë qytetarëve.

Kryetari, në vend që të jetë pranë qytetarëve dhe problemeve të tyre, ka zgjedhur të “struket” në zyrën e tij. Dhe të vetmet raste kur del në terren janë për të promovuar projektet kapitale të nisura dhe të realizuara nga qeverisja paraprake e Fatmir Deharit dhe Bashkimit Demokratik për Integrim.
Pa asnjë premtim të realizuar, e besa as të nisur, Aleksandar Jovanovski, përballë këtij DËSHTIMI TOTAL të vitit të parë, në vend që të mbajë përgjegjësi dhe të japë llogari para qytetarëve, ka vendosur të fshihet!

Kryetar,
Premtimet e dhëna gjatë fushatës elektorale nuk janë deklarata për konsum elektoral, por janë fjalë e dhënë dhe zotime publike ndaj qytetarëve. Prandaj, për mosrealizimin e tyre duhet të mbani përgjegjësi dhe të jepni llogari!
Kryetar,
Fondet publike nuk janë tuajat, por të qytetarëve që paguajnë taksa. Kërçovarëve u detyroheni transparencë të plotë për mënyrën e shpenzimit dhe shpërndarjes së tyre.

Kryetar,
Komuna u përket të gjithëve, pa dallim kombësie apo përkatësie politike. Shqetësimet për largime selektive dhe punësime partiake kërkojnë përgjigje. Ndarja e qytetarëve në të privilegjuar dhe të anashkaluar bie ndesh me frymën e barazisë dhe bashkëjetesës multietnike, të kultivuar gjatë 12 viteve të qeverisjes paraprake.

Kryetar,
Flamuri shqiptar dhe gjuha shqipe, përveçse gëzojnë mbrojtje dhe përdorim të garantuar me ligj, janë pjesë e identitetit të bashkëqytetarëve tuaj shqiptarë, të cilët përbëjnë shumicën e popullsisë në Komunën e Kërçovës. Andaj, çdo mospërfillje e të drejtave të tyre të garantuara me ligj, jo vetëm se përbën shkelje të rendit juridik të Republikës së Maqedonisë së Veriut, por është edhe ofendim ndaj shumicës së popullsisë së qytetit që ju drejtoni.

Të nderuar qytetarë,
Një vit më parë, Aleksandar Jovanovski mori çelësat e zyrës së kryetarit të Komunës së Kërçovës. Por çelësat e zyrës nuk janë dëshmi e suksesit, as karrigia e kryetarit nuk është qëllim në vetvete!
Sot, pas 365 ditësh, ju keni të drejtë të kërkoni llogari si nga kryetari, ashtu edhe nga ata që e mbështesin duke ja siguruar shumicën në Këshillin Komunal:
Cilat premtime janë përmbushur?
Cilat projekte kapitale janë realizuar?

Si janë shpenzuar paratë tuaja?
Kërçovarëve nuk u duhen njerëz që rrinë duarkryq dhe përvetësojnë meritat e punës së të tjerëve, por njerëz që punojnë dhe u shërbejnë qytetarëve.

/tvgurra