Zvicër, dy hajdutë shqiptarë të maskuar kapen në flagrancë duke vjedhur në një shtëpi!

Dy burra të moshës 22 dhe 24 vjeç u arrestuan të dielën, më 8 nëntor 2026, në Staufen të kantonit Aargau, pasi banorët e një shtëpie dëgjuan zhurma të dyshimta dhe njoftuan policinë. Dy policë u lënduan lehtë gjatë ndërhyrjes.

Ngjarja ndodhi pak para orës 19:00 në rrugën Hauptstrasse. Sipas raportimit të Urgjent.com, pronarët sapo ishin kthyer në shtëpi dhe ndodheshin në garazhin nëntokësor kur dëgjuan zhurma nga brenda. Meqë nuk prisnin të kishte njeri në shtëpi, qëndruan në garazh dhe telefonuan policinë.

Patrullat e Policisë Kantonale të Aargaut dhe të Policisë Rajonale të Lenzburgut konstatuan se brenda ndërtesës ndodheshin dy persona të maskuar. Kur vunë re policinë, të dyshuarit tentuan të largoheshin përmes garazhit nëntokësor, ku u arrestuan në zonën e parkimit.

Dy policët e lënduar u dërguan në spital për kontroll mjekësor. Sipas autoriteteve, të arrestuarit janë shtetas shqiptarë dhe janë vendosur në ndalim të përkohshëm.
Policia Kantonale e Aargaut po heton rrethanat e ngjarjes dhe po shqyrton nëse të dyshuarit mund të kenë lidhje me vepra të tjera penale. Të arrestuarit gëzojnë prezumimin e pafajësisë.

/urgjent