SHMK „Drita” e Kërçovës pjesë e projektit erasmus+ në Zarë të Kroacisë

48 të rinj nga katër vende evropiane po zhvillojnë aftësi në shkrim, komunikim, inteligjencë artificiale dhe krijimtari përmes projektit ndërkombëtar „Ink & Impact”. Shkolla e Mesme Komunale „Drita” nga Kërçova po merr pjesë në projektin ndërkombëtar të shkëmbimit rinor Erasmus+ „Ink & Impact”, i cili po zhvillohet nga 3 deri më 11 nëntor 2026 në Zarë (Zadar) të Kroacisë.

Në këtë projekt janë përfshirë 48 të rinj të moshës 15–18 vjeç nga Kroacia, Maqedonia e Veriut, Rumania dhe Polonia, të cilët përmes aktiviteteve edukative, punëtorive praktike dhe bashkëpunimit ndërkulturor po zhvillojnë njohuri dhe aftësi të reja për jetën e përditshme dhe të ardhmen profesionale.

Gjatë gjysmës së parë të projektit, pjesëmarrësit kanë trajtuar tema të ndryshme, duke filluar nga rëndësia e shkrimit dhe mbajtja e ditarit si formë e vetënjohjes, reflektimit dhe kujdesit për shëndetin mendor, e deri te përdorimi i inteligjencës artificiale në proceset krijuese.

Një vëmendje e veçantë i është kushtuar edhe aftësive digjitale dhe komunikimit praktik, përmes krijimit të faqeve të internetit me mjete të inteligjencës artificiale, konceptimit dhe realizimit të vlogjeve, shkrimit të e-maileve për situata të ndryshme, si dhe përgatitjes së CV-ve për prezantimin sa më të mirë të aftësive dhe përvojës personale.

Krahas programit edukativ, të rinjtë kanë marrë pjesë në aktivitete njohjeje, ndërtimi të frymës ekipore dhe përcaktimi të objektivave personale të të nxënit përmes platformës Youthpass.

Dimension të veçantë projektit i kanë dhënë edhe aktivitetet ndërkulturore, ku pjesëmarrësit kanë prezantuar vendet e tyre, traditat, zakonet, ushqimin dhe muzikën, duke krijuar mundësi për njohje të ndërsjellë dhe miqësi përtej kufijve shtetërorë.

Projekti realizohet në partneritet me katër institucione arsimore: Industrijsko-obrtnička škola Sisak nga Kroacia, si koordinatore e projektit, SHMK „Drita” nga Maqedonia e Veriut, Liceul Tehnologic „General Magheru” nga Rumania dhe Powiatowe Centrum Kształcenia Zawodowego i Ustawicznego w Wodzisławiu Śląskim nga Polonia.

Përmes këtij bashkëpunimi ndërkombëtar, të rinjtë po fitojnë përvoja të reja, po zhvillojnë aftësitë e komunikimit dhe krijimtarisë dhe po mësojnë të përdorin teknologjinë në mënyrë sa më produktive.

Projekti „Ink & Impact” zhvillohet në Zarë të Kroacisë, nga 3 deri më 11 nëntor 2026, me numër identifikues 2026-1-HR01-KA152-YOU-000393755, dhe bashkëfinancohet nga Bashkimi Evropian.

/tvgurra