Sejdini nën hetime për dy raste dhe mbrohet ne liri ?

Prokuroria e Shkupit ende vazhdon hetimet kundër ish kryetarit të Federatës së Futbollit Muhamed Sejdini i cili dyshohet për veprën penale “Mashtrim në shërbim” pasi sipas gjetjeve të Prokurorisë, në periudhën prej nëntorit deri në dhjetor të vitit 2024 kishte mundësuar transferimin e rreth 660 mijë eurove te një kompani nga Shkupi, si paradhënie për ndërtimin e tribunës në stadiumin “Burimet e Biljanës” në Ohër.

“Në lëndën po ndërmerren veprime në procedurë hetimore. Pas miratimit të vendimit prokurorial publik, do të informohet opinioni”. – Thanë nga Prokuroria Themelore Publike.

Hetimet vazhdojnë edhe për lëndën tjetër të cilën e udhëheqë Prokuroria për Ndjekjen e Krimit të Organizuar dhe Korrupsionit, e cila u hap në qershor të këtij viti. Sejdini së bashku me ish kryetarin tjetër të FFM-së, Illço Gjorgjioski, 16 persona të tjerë dhe 8 kompani, dyshohen për shpërdorimin e rreth 3 milionë eurove.

Sipas Prokurorisë, dyshohet që rreth 3 milionë euro janë nxjerrë nga FFM-ja përmes pagesave të bazuara në fatura të rreme, për shërbime dhe mallra që Federata nuk i kishte marrë.

Sejdini pas tre muajve në paraburgim, prej 24 korrikut mbrohet në liri pasi dha garanci në vlerë prej 1 milion e 150 euro. Prokuroria kishte dhënë mendim pozitiv për të pranuar garancinë, ndërsa Gjykata e kishte sjellë vendimin me të cilin u shfuqizua paraburgimi. Megjithatë, Sejdinit i është konfiskuar pasaporta, ndërsa është nën masa më të lehta kujdesi.

/Alsat.mk