Stuhitë godasin Evropën Veriore: Anulohen fluturimet !

Kalimi i njëpasnjëshëm i stuhive Boelo dhe Austen në Evropën Veriore dhe Qendrore gjatë fundjavës shkaktoi ndërprerje në transport dhe furnizimin me energji elektrike, veçanërisht në Mbretërinë e Bashkuar, Holandë dhe Gjermani. Erërat e forta përfshinë edhe Zvicrën, por atje nuk u raportuan dëme të mëdha.

Në Mbretërinë e Bashkuar, autoritetet lëshuan alarm portokalli për erëra të forta në Skoci dhe në veri të Anglisë. Të dielën, në disa zona, shpejtësia e rafaleve të erës arriti deri në 135 kilometra në orë, sipas Shërbimit Meteorologjik Britanik (Met Office).

Autoritetet paralajmëruan se objektet e bartura nga era dhe dallgët e larta përbënin rrezik serioz për jetën, duke u bërë thirrje banorëve të qëndronin brenda ndërtesave.

Sipas raportimeve, rreth 82 mijë familje në mbarë vendin mbetën pa energji elektrike. Transporti u përball gjithashtu me vështirësi për shkak të pemëve të rrëzuara dhe përmbytjeve, të cilat bllokuan rrugë dhe linja hekurudhore.

Në Aeroportin Ndërkombëtar të Belfastit u anuluan rreth 15 fluturime. Anulime pati edhe në linjat ajrore drejt dhe nga Londra, Glasgou dhe Lidsi.

Erëra të fuqishme edhe në Gjermani
Në Gjermani, stuhia shkaktoi ndërprerje të energjisë elektrike në qytetin Freiburg im Breisgau, në jugperëndim të vendit, si dhe në disa komuna përreth. Rreth 10 mijë familje mbetën pa energji, ndërsa u raportuan probleme edhe në funksionimin e spitalit universitar të qytetit.

Rafalet e fuqishme rrëzuan pemë dhe dëmtuan linjat elektrike në disa lokacione. Në lindje të qytetit, një çati prej llamarine, e shkëputur nga era, përfundoi mbi një linjë të furnizimit me energji elektrike.

Të shtunën, stuhia shkaktoi shembjen e një skelë në një treg në jugperëndim të Gjermanisë, duke lënduar rëndë dy persona.
Edhe parku i njohur argëtues Europa-Park mbylli disa atraksione si masë paraprake sigurie.

Anulohen të paktën 90 fluturime në Amsterdam
Aeroporti Schiphol i Amsterdamit, një nga nyjet më të rëndësishme të transportit ajror në Evropë, anuloi të paktën 90 fluturime të dielën për shkak të erërave të forta.

Dhjetëra fluturime të tjera që ishte planifikuar të uleshin në këtë aeroport u anuluan ose pësuan vonesa.

Ndërkohë, në Zvicër, fundjava u karakterizua nga reshje shiu dhe erëra të forta. Megjithatë, policia kantonale nuk raportoi dëme të mëdha, ndërsa transporti publik nuk pësoi vonesa të konsiderueshme

/albinfo.ch