Pronësia e banesave në Zvicër, dallime të mëdha nga një kanton në tjetrin ?

Në Appenzell Innerrhoden më shumë se gjysma e banesave janë të banuara nga pronarët e tyre, ndërsa në Basel-Stadt kjo përqindje është vetëm 14%
Zvicra vazhdon të ketë një nga nivelet më të ulëta të pronësisë së banesave në Evropë, por të dhënat tregojnë dallime të konsiderueshme ndërmjet kantoneve.

Në vitin 2024, vetëm 35.7 për qind e banesave të banuara në mënyrë të përhershme në Zvicër ishin në pronësi të personave që jetonin në to. Megjithatë, në disa kantone kjo përqindje kalon 50 për qind, ndërsa në qendrat e mëdha urbane është dukshëm më e ulët, transmeton albinfo.ch.

Normën më të lartë të pronësisë e kishte Appenzell Innerrhoden me 55.8 për qind, i ndjekur nga Valais me 52.6 për qind dhe Jura me 48.3 për qind. Në anën tjetër, Basel-Stadt kishte nivelin më të ulët, me vetëm 14 për qind. Në Gjenevë pronarët përbënin 18.6 për qind, në Cyrih 27.1 për qind, ndërsa në Vaud 29.6 për qind.

Një nga arsyet kryesore për këto dallime është ndarja ndërmjet zonave urbane dhe rurale. Kantonet me shkallë më të lartë të pronësisë kanë më shumë fshatra, qytete të vogla dhe shtëpi individuale. Disponueshmëria më e madhe e tokës dhe dendësia më e ulët e popullsisë e bëjnë më të lehtë blerjen e një shtëpie.

Situata është ndryshe në kantone si Basel-Stadt, Gjenevë dhe Cyrih, ku dominojnë ndërtesat me apartamente dhe një pjesë e madhe e tregut të banimit është e orientuar drejt qirasë. Çmimet e larta të pronave dhe mungesa e tokës e bëjnë gjithashtu më të vështirë blerjen e një banese.

Një tjetër pengesë janë kriteret për marrjen e hipotekave. Bankat zvicerane e vlerësojnë aftësinë financiare të blerësve duke përdorur norma teorike interesi dukshëm më të larta se normat aktuale, së bashku me kostot e mirëmbajtjes dhe amortizimit. Kjo bën që familjet në kantonet ku pronat janë shumë të shtrenjta ta kenë më të vështirë të plotësojnë kushtet për financim.

Edhe demografia luan rol. Qendrat urbane si Gjeneva, Cyrihu, Vaud dhe Bazeli tërheqin më shumë të rinj, punonjës ndërkombëtarë dhe persona që mund të ndryshojnë vendbanimin, kategori që kanë më shumë gjasa të zgjedhin qiranë.

Të dhënat tregojnë se Zvicra nuk ka një treg të vetëm të banesave. Mundësia për t’u bërë pronar ndryshon ndjeshëm në varësi të kantonit, çmimeve të pronave, llojit të banesave në dispozicion dhe strukturës së popullsisë.

/albinfo