Kallëzim penal për projektin e kanalizimit në Kërçovë: Humbën mbi 9.4 milionë euro !

Drejtoria e Policisë Financiare ka paraqitur kallëzim penal në Prokurorinë Themelore Publike Shkup kundër personit S.G.O.B., shtetas i huaj, në cilësinë e pronarit dhe menaxherit të një personi juridik, si dhe kundër vetë personit juridik, për shkak të ekzistimit të bazave të dyshimit për kryerjen e veprës penale “Keqpërdorimi i procedurës së thirrjes publike, dhënies së kontratës për prokurim publik ose partneritet publik-privat” nga neni 275-v i Kodit Penal të Republikës së Maqedonisë së Veriut, transmeton Portalb.mk.

I denoncuari S.G.O.B., në cilësinë e pronarit dhe menaxherit të personit juridik të denoncuar, me vetëdije dhe me qëllim ka shkelur dispozitat që lidhen me procedurën e thirrjes publike për projektin “Rehabilitimi dhe zgjerimi i rrjetit të kanalizimit në Komunën e Kërçovës”, për të cilin në vitin 2023 ishte lidhur kontratë me Ministrinë e Financave të RMV-së – Sektorin për financim qendror dhe lidhjen e kontratave në kuadër të Programit Operativ Sektorial për Mjedisin Jetësor dhe Veprimet Klimatike për IPA II (2014-2020).

Ai ka vepruar në atë mënyrë që, edhe pse ishte i detyruar që gjatë realizimit të projektit të siguronte garanci bankare të vlefshme, si dhe të paraqiste kërkesë për miratimin e nënkontraktorëve pranë organit kontraktues, gjatë zbatimit të kontratës së financuar nga Komisioni Evropian dhe Buxheti i RMV-së, e ka fshehur falimentimin e bankës azerbajxhanase “Muganbank”, e cila kishte lëshuar garancinë bankare. Në këtë mënyrë ai nuk ka zbuluar faktin se nuk dispononte më me një garanci të vlefshme.

Njëkohësisht, ai ka angazhuar nënkontraktorë pa siguruar paraprakisht miratimin e Ministrisë së Financave dhe organit mbikëqyrës, duke vepruar në kundërshtim me detyrimet kontraktuale dhe kushtet për realizimin e projektit, për çka kontrata është ndërprerë.

Me veprimet e lartpërmendura, të denoncuarit i kanë shkaktuar dëm Buxhetit të Republikës së Maqedonisë së Veriut në shumën totale prej 127.425.036 denarësh, si dhe dëm në bazë të humbjes së mjeteve IPA në vlerë prej 9.474.132 eurosh, të cilat shteti do të duhet t’i sigurojë nga mjetet e veta.

/porta.mk