Shoqatat në Kërçovë kërkojnë transparencë për fondet kulturore ?

Disa shoqata dhe përfaqësues të sektorit civil në Kërçovë u kanë bërë thirrje këshilltarëve shqiptarë, veçanërisht atyre të koalicionit VLEN në Komunën e Kërçovës, që në seancën e 20 majit të vendosin në rend dite dhe të hapin për diskutim çështjen e ndarjes së fondeve për projektet kulturore.

Sipas reagimeve të tyre, vetëm 16% e mjeteve janë ndarë për projekte shqiptare, ndërsa mbi 80% për projekte maqedonase, gjë që, sipas tyre, ngre dyshime për trajtim të pabarabartë.

Njëkohësisht, i bëhet thirrje Ministria e Kulturës dhe përfaqësuesve shqiptarë të VLENIT përgjegjës për projektin “Kërçova Qytet i Kulturës 2026” që të japin sqarime publike mbi kriteret e përzgjedhjes dhe mënyrën e shpërndarjes së mjeteve.

Ata paralajmërojnë se do të nisin iniciativë pranë Komisioni për Parandalim dhe Mbrojtje nga Diskriminimi për të shqyrtuar mundësinë e diskriminimit.

Njëkohësisht, kërkojnë të merren masa edhe të ketë transparencë më të madhe në ndarjen e fondeve për sportin, duke insistuar që shpërndarja të bëhet mbi baza të kritereve të qarta dhe meritës.

/tvgurra