Kërçovë: Maturantët e SHMK“DRITA” njohin nga afër botën e inxhinierisë së ndërtimit

Në kuadër të aktiviteteve për Këshillim Karriere, maturantët e SHMK “DRITA” – Kërçovë, të udhëhequr nga profesor Bashkim Mehmeti dhe profesoresha Arbnora Rushani, zhvilluan një vizitë në zyrën e projektimit “Inxhinieria e Ndërtimit”, nën drejtimin e Doc. Dr. Festim Ademi, njëherazi ligjërues në Universitetin e Tetovës dhe shef i programit studimor – Ndërtimtari, Fakulteti i Shkencave të Zbatuara.

Kjo përvojë e drejtpërdrejtë u mundësoi nxënësve të depërtojnë në thelbin e një prej profesioneve më të rëndësishme për zhvillimin urban dhe infrastrukturor. Ata u njohën me sfidat, përparësitë dhe perspektivat që ofron kjo fushë, si dhe me mundësitë reale për ndërtimin e një karriere të qëndrueshme dhe të suksesshme.

Në një atmosferë mikpritëse dhe profesionale, Doc. Dr. Sc. Festim Ademi ndau me nxënësit rrugëtimin e tij akademik dhe profesional, duke sjellë një model frymëzues përkushtimi dhe arritjeje. Përmes këtij bashkëbisedimi, maturantët patën rastin të kuptojnë më qartë hapat drejt realizimit të ambicieve të tyre.

Shkolla shpreh mirënjohje të veçantë për mikpritjen dhe kontributin e dhënë, duke besuar se përvoja të tilla do të shërbejnë si udhërrëfyes i çmuar për orientimin e drejtë të nxënësve në zgjedhjet e tyre të ardhshme.

/tvgurra