VLEN: “Kutia e zezë” Artan Grubi e mban BDI-në peng !?

VLEN ka lëshuar akuza të ashpra ndaj BDI-së, duke pretenduar se partia po mbahet “peng” nga ish-funksionari Artan Grubi, të cilin e quan “kutia e zezë” e partisë, për shkak të njohurive që sipas tyre ai ka mbi marrëveshje, tenderë dhe keqpërdorime të pretenduara.

Në reagimin e tyre, nga VLEN thonë se BDI nuk i ngjan më një partie politike, por është shndërruar në një strukturë të mbyllur që, sipas tyre, funksionon mbi frikë, shantazh dhe panik, ndërsa pretendojnë se pas deklaratave publike për unitet, partia kontrollohet nga Artan Grubi me bekimin e Ali Ahmetit.

Sipas VLEN-it, ajo që BDI e paraqet si unitet, në të vërtetë është heshtje e imponuar nga frika dhe dosjet komprometuese, ndërsa shtojnë se shumë funksionarë të kësaj partie druhen nga ajo që, sipas tyre, mund të dalë në dritë nëse “hapet kutia e zezë”.

Në reagim përmenden edhe hetimet dhe rastet e korrupsionit, për të cilat VLEN pretendon se dëshmojnë “shpërbërjen e një sistemi”, duke akuzuar BDI-në për ndërtimin e një “perandorie mbi frikë, para dhe shantazh”, e cila sipas tyre po shembet.

Nga VLEN thonë se me çlirimin e drejtësisë nga ndikimet politike, po dalin në pah skandale dhe keqpërdorime, ndërsa paralajmërojnë se zhvillimet e ardhshme mund të thellojnë krizën brenda BDI-së.

Në fund, VLEN thekson se shqiptarët nuk duhet të mbeten, siç thonë, peng i një strukture destruktive, duke e paraqitur veten si alternativë që mbështetet te përgjegjësia dhe transparenca.

/ina