Irani kërcënon SHBA-në: Do të kundërpërgjigjemi ashpër ndaj çdo sulmi!

Forcat e armatosura të Iranit kanë paralajmëruar Shtetet e Bashkuara kundër çdo sulmi të ri, duke theksuar se do të reagojnë nëse përshkallëzohet situata në rajon.

Në një deklaratë zyrtare, Shtabi i Forcave të Armatosura iraniane Khatam al-Anbiya deklaroi se: “Nëse ushtria agresore amerikane vazhdon rrethimin, banditizmin dhe piraterinë në rajon, ajo duhet të jetë e sigurt se do të përballet me një reagim nga forcat e fuqishme të armatosura të Iranit”.

Autoritetet iraniane theksuan se mbeten të vendosura për të shkaktuar pasoja më të rënda në rast të një përshkallëzimi të ri.

“Ne jemi të gatshëm dhe të vendosur t’u shkaktojmë dëme më të rënda armiqve amerikano-sionistë në rast të një agresioni tjetër, ndërkohë që monitorojmë sjelljen dhe lëvizjet e tyre në rajon dhe vazhdojmë të menaxhojmë dhe kontrollojmë Ngushticën strategjike të Hormuzit”, thuhet në deklaratë.

Ngushtica e Hormuzit mbetet një nga rrugët më të rëndësishme për tregtinë globale të energjisë, ndërsa tensionet në rajon vijojnë të mbeten të larta.

/ms